പൊന്നാനിയില്‍ പൊതു സ്വതന്ത്രന്‍; കോഴിക്കോടും വേണം

ദില്ലി: പൊന്നാനിയില്‍ പൊതു സ്വതന്ത്രനെ നിര്‍ത്താനും കോഴിക്കോട്‌ ജനതാദളില്‍ നിന്ന് ഏറ്റെടുക്കാനുമായി സംസ്ഥാന നേതൃത്വം സ്വീകരിച്ച നിലപാടുകള്‍ സിപിഎം കേന്ദ്ര കമ്മിറ്റി അംഗീകരിച്ചു.

എതിര്‍പ്പുകള്‍ അവഗണിച്ച്‌ പൊന്നാനിയില്‍ പൊതു സ്വതന്ത്രനെ നിര്‍ത്താനും കോഴിക്കോട്‌ സിപിഎം സ്ഥാനാര്‍ത്ഥിയെ നിര്‍ത്താനുമാണ്‌ കേന്ദ്ര കമ്മിറ്റി അംഗീകാരം നല്കിയിരിക്കുന്നത്. വിജയസാധ്യത മുന്‍നിര്‍ത്തിയാണ്‌ കോഴിക്കോട്‌, പൊന്നാനി മണ്ഡലങ്ങളില്‍ മാറ്റം വേണമെന്ന കാര്യത്തില്‍ ഉറച്ചു നില്‌ക്കുന്നതെന്ന്‌ സംസ്ഥാന നേതൃത്വം കേന്ദ്ര കമ്മിറ്റിയെ ധരിപ്പിച്ചു.

കേന്ദ്ര കമ്മിറ്റി നിലപാടിനെ പിഡിപിയും അംഗീകരിച്ചു. ഇതോടെ പൊന്നാനി മണ്ഡലത്തെ ചുറ്റിപ്പറ്റിയുള്ള വിവാദങ്ങള്‍ക്ക്‌ വിരാമമാകുമെന്ന്‌ പ്രതീക്ഷിയ്‌ക്കുന്നതായി പിഡിപി നേതാവ്‌ പൂന്തുറ സിറാജ്‌ പറഞ്ഞു.

രാജ്യമൊട്ടാകെ അമ്പത്‌ മണ്ഡലങ്ങളില്‍ മത്സരിയ്‌ക്കാന്‍ യോഗം തീരുമാനിച്ചു. കേരളമുള്‍പ്പെടെയുള്ള നാല്‌ സംസ്ഥാനങ്ങളിലെ സ്ഥാനാര്‍ത്ഥികളെ പിന്നീട്‌ തീരുമാനിയ്‌ക്കും.