എസ്എസ്എല്‍സി പരീക്ഷ ബുധനാഴ്ച തുടങ്ങുന്നു

തിരുവനന്തപുരം: ഏഷ്യയിലെ ഏറ്റവും വലിയ പൊതുപരീക്ഷയ്ക്ക് ബുധനാഴ്ച തുടക്കം. എസ്എസ്എല്‍സി, ഹയര്‍ സെക്കന്‍ഡറി, വിഎച്ചഎസ്ഇ എന്നീ വിഭാഗങ്ങളിലായി 12,93,582 വിദ്യാര്‍ത്ഥികളാണ് ബുധനാഴ്ച പരീക്ഷാ ഹാളുകളിലെത്തുക.

വിദ്യാര്‍ത്ഥികള്‍ക്ക് മോശമില്ലാതെ എഴുതാന്‍ കഴിയുന്ന വിധത്തിലുള്ള ചോദ്യങ്ങളാണ് പരീക്ഷയ്ക്ക് ഉണ്ടാവുകയെന്നും മാനസിക സംഘര്‍ഷം അനുഭവിയ്ക്കേണ്ട കാര്യമില്ലെന്നും മന്ത്രി എംഎ ബേബി പറഞ്ഞു.

സംസ്ഥാനത്തും ലക്ഷദ്വീപിലും ഗള്‍ഫിലുമായി 2731 കേന്ദ്രങ്ങളിലായി 4,46,625 വിദ്യാര്‍ഥികളാണ്‌ എസ്‌എസ്‌എല്‍സി പരീക്ഷയെഴുതുന്നത്. ഏറ്റവും കൂടുതല്‍ വിദ്യാര്‍ഥികള്‍ പരീക്ഷയ്ക്കിരിക്കുന്നത്‌ മലപ്പുറം ജില്ലയിലും കുറവ്‌ വയനാട്ടിലുമാണ്. വിദ്യാഭ്യാസജില്ലാ അടിസ്ഥാനത്തില്‍ ഏറ്റവും കൂടുതല്‍ പേര്‍ പരീക്ഷയെഴുതുന്നത്‌ തിരൂരിലും കുറവ്‌ കുട്ടനാട്ടിലുമാണ്.. പരീക്ഷയ്ക്ക്‌ ഒരുക്കങ്ങളെല്ലാം പൂര്‍ത്തിയായി. ചോദ്യക്കടലാസുകള്‍ ട്രഷറികളിലും ബാങ്കുകളിലും എത്തിച്ചിട്ടുണ്ട്‌. 26നാണ്‌ പരീക്ഷ അവസാനിക്കുന്നത്‌.

ബുധാനാഴ്ച തന്നെ ആരംഭിയ്ക്കുന്ന ഹയര്‍ സെക്കന്‍ഡറി പരീക്ഷയില്‍ 7,90,903 പേര്‍ പരീക്ഷയെഴുതുന്നുണ്ട്. ഇതില്‍ 4,09,357 പേര്‍ രണ്ടാംവര്‍ഷ വിദ്യാര്‍ഥികളും 3,81,546 പേര്‍ ഒന്നാം വര്‍ഷ വിദ്യാര്‍ഥികളുമാണ്. പ്ലസ്‌ വണ്ണിന്‌ ഇതാദ്യമായാണ്‌ പൊതുപരീക്ഷ നടത്തുന്നത്. ഹയര്‍ സെക്കന്‍ഡറി പരീക്ഷകള്‍ രാവിലെയും എസ്എസ്എല്‍സി പരീക്ഷകള്‍ ഉച്ച കഴിഞ്ഞുമാണ് നടക്കുക.

ഇതിനിടെ വാഹനാപകടത്തില്‍ പരിക്കേറ്റ ചാവക്കാട് എടക്കഴിയൂര്‍ സ്കൂളിലെ 10 വിദ്യാര്‍ത്ഥിനികള്‍ക്ക് എസ്എസ്എല്‍സി പരീക്ഷ എഴുതാന്‍ പ്രത്യേക അനുമതി നല്കിക്കൊണ്ട് സര്‍ക്കാര്‍ ഉത്തരവിറക്കി.