ഹൈബിയ്ക്കായി സഭ സോണിയയ്ക്ക് കത്തയച്ചു
ഹൈബി ഉള്പ്പെടെ നാലാളുകളുടെ പേരാണ് കത്തില് ഉള്ളത്. ലത്തീന് കത്തോലിക്കാസഭയുടെ രാഷ്ട്രീയ കാര്യസമിതിയായ കെആര്എല്സിബിസിയുടെ പേരിലാണ് വാരാപ്പുഴ അതിരൂപതാ ആര്ച്ച് ബിഷപ്പ് ഡാനിയേല് അച്ചാരുപറമ്പില് ഒപ്പിട്ട കത്ത് അയച്ചിരിക്കുന്നത്.
ഹൈബിയെക്കൂടാതെ 2004ല് സെബാസ്റ്റ്യന് പോളിനോട് മത്സരിച്ച് തോറ്റ എഡ്വേഡ് എടേഴത്ത്, കെ.ജി ലീനസ്, ലാലി വിന്സെന്റ് എന്നിവരുടെ പേരുകളാണ് സഭ നിര്ദ്ദേശിച്ചിരിക്കുന്നത്. നേരത്തേ ലത്തീന് കത്തോലിക്കാ സഭയുടെ പിന്തുണയുണ്ടായിരുന്ന മുന്മന്ത്രി കെവി തോമസ്, ഡൊമിനിക് പ്രസന്റേഷന് എന്നിവരുടെ പേര് പട്ടികയിലില്ലെന്നത് ശ്രദ്ധേയമാണ്.
സ്ഥാനാര്ത്ഥി നിര്ണയത്തില് സഭകള് നേരിട്ട് ഇടപെടരുതെന്ന മാര് വര്ക്കി വിതയത്തിലിന്റെ അഭിപ്രായത്തിന് വിരുദ്ധമായിട്ടാണ് കെസിബിസി പ്രസിഡന്റു കൂടിയായ അച്ചാരുപറമ്പില് കത്തയച്ചിരിക്കുന്നത്.
കെഎസ്യുവിന്റെ വിവിധ ജില്ലാ കമ്മിറ്റികള് ഹൈബിയ്ക്ക് പിന്തുണ പ്രഖ്യാപിച്ച് കത്തയിച്ചിട്ടുണ്ട്. ഇതിനിടെ ഹൈബിയ്ക്ക് മുതിര്ന്ന കോണ്ഗ്രസ് നേതാവ് കെ കരുണാകരനും പിന്തുണ പ്രഖ്യാപിച്ചിട്ടുണ്ട്. എസ്എഫ്ഐ നേതാവായിരുന്ന സിന്ധു ജോയിയാണ് എറണാകുളത്തെ ഇടത് സ്ഥാനാര്ത്ഥി.