റാഗിങ്: ആനുകൂല്യം റദ്ദാക്കുമെന്ന് യുജിസി
ചണ്ഡീഗഡ്: കലാലയങ്ങളില് റാഗിങ് തടയാന് വേണ്ട നടപടികള് സ്വീകരിച്ചില്ലെങ്കില് അത്തരം കോളെജുകള്ക്കുള്ള ആനുകൂല്യങ്ങളും ഫണ്ടുകളും നിര്ത്തലാക്കുമെന്ന് യൂണിവേഴ്സിറ്റി ഗ്രാന്റ് കമ്മീഷന്(യുജിസി) അറിയിച്ചു.
ഹിമാചല് പ്രദേശിലെ ഡോക്ടര് രാജേന്ദ്രപ്രസാദ് മെഡക്കല് കോളെജില് റാഗിങ്ങിനെത്തുടര്ന്ന് ഒരു വിദ്യാര്ത്ഥി മരിക്കുകയും, ആന്ധ്രപ്രദേശില് റാഗിങ്ങിനെത്തുടര്ന്ന് ഒരു വിദ്യാര്ത്ഥിനി ആത്മഹത്യാശ്രമം നടത്തുകയും ചെയ്ത പശ്ചാത്തിലാണ് യുജിസി കര്ശന നിര്ദ്ദേശം നല്കിയിരിക്കുന്നത്.
റാഗിങ്ങിനെതിരെ കര്ശന നടപടികള് എടുക്കാന് തയ്യാറാകാതിരുന്നാല് അത്തരം കോളെജുകള്ക്കുള്ള എല്ലാ ആനുകൂല്യങ്ങളും നിര്ത്തലാക്കുമെന്ന് യുജിസി ജോയിന്റ് ഡയറക്ടര് ഹര്മീന്ദര് കൗര് ചൗഹാനാണ് അറിയിച്ചിരിക്കുന്നത്. അടുത്ത അധ്യയന വര്ഷം റാഗിങ് തടയുന്നതിനായി ഉന്നതാധികാര സമിതി രൂപീകരിക്കുമെന്നും ചൗഹാന് അറിയിച്ചു.
ഹിമാചലില് സീനിയര് വിദ്യാര്ത്ഥികളുടെ മര്ദ്ദനത്തെത്തുടര്ന്നാണ് മെഡിക്കല് വിദ്യാര്ത്ഥിയായ പത്തൊന്പതുകാരന് മരിച്ചത്. ആന്ധ്രയില് മുതിര്ന്ന പെണ്കുട്ടികള് റാഗിങ്ങിന്റെ പേരില് നഗ്നനൃത്തം ചെയ്യിച്ചതില് മനംനൊന്താണ് വിദ്യാര്ത്ഥിനി ആത്മഹത്യയ്ക്ക് ശ്രമിച്ചത്.