തിരഞ്ഞെടുപ്പ് തീയതി മാറ്റില്ല

ദില്ലി: കേരളത്തിലെ തിരഞ്ഞെടുപ്പ് തീയതി മാറ്റില്ലെന്ന് കേന്ദ്ര തിരഞ്ഞെടുപ്പ് കമ്മീഷന്‍ വൃത്തങ്ങള്‍ സൂചിപ്പിച്ചു. തിങ്കളാഴ്ച വൈകിട്ട് നടക്കുന്ന കമ്മീഷന്റെ സന്പൂര്‍ണ യോഗത്തിന് ശേഷമെ ഇക്കാര്യത്തില്‍ അന്തിമ പ്രഖ്യാപനം ഉണ്ടാകുകയുള്ളൂ.

കേരളത്തിലെ രണ്ട് പാര്‍ട്ടികള്‍ മാത്രമാണ് തിരഞ്ഞെടുപ്പ് തീയതി മാറ്റണമെന്ന് ആവശ്യപ്പെട്ടിരുന്നുള്ളുവെന്ന് കമ്മീഷന്‍ വൃത്തങ്ങള്‍ വ്യക്തമാക്കി. ഇക്കാര്യത്തില്‍ പ്രധാനമായും ശുപാര്‍ശ നല്കേണ്ട സംസ്ഥാന സര്‍ക്കാര്‍ തീയതി മാറ്റണമെന്ന് ഔദ്യോഗികമായി ആവശ്യപ്പെട്ടിട്ടുമില്ല. ഈ സാഹചര്യത്തിലാണ് കേരളത്തിലെ തീയതികള്‍ മാറ്റേണ്ടെന്ന നിലപാടില്‍ കമ്മീഷന്‍ എത്തിയത്.

തിങ്കളാഴ്ച നടക്കന്ന യോഗത്തില്‍ 30 ഐഎഎസ് ഓഫീസര്‍മാര്‍ പങ്കെടുക്കുന്നുണ്ട്. സംസ്ഥാനത്ത് എത്ര തിരഞ്ഞെടുപ്പ് നിരീക്ഷകര്‍ വേണമെന്ന കാര്യം യോഗത്തില്‍ തീരുമാനമാനിയ്ക്കും.മുഖ്യ തിരഞ്ഞെടുപ്പ് കമ്മീഷണര്‍ എന്‍ ഗോപാലസ്വാമിയുമായുള്ള ചര്‍ച്ചയില്‍ കേരളത്തിലെ തിരഞ്ഞെടുപ്പ് തീയതി മാറ്റണമെന്ന് സിപിഐയും ബിജെപിയും ആവശ്യപ്പെട്ടിരുന്നു.

വിഷു, ഈസ്റ്റര്‍ ആഘോഷ ദിനങ്ങള്‍ തിരഞ്ഞെടുപ്പിനോട് അടുത്ത് വരുന്നതിനാലാണ് തീയതി മാറ്റാന്‍ ഇവര്‍ ആവശ്യമുന്നയിച്ചത്. എന്നാല്‍ തീയതി മാറ്റേണ്ടെന്ന നിലപാടാണ് കോണ്‍ഗ്രസും സിപിഎമ്മും സ്വീകരിച്ചത്.