പൊലീസുകാരന്റെ ചെവി കടിച്ചതിന്‌ 5വര്‍ഷം തടവ്‌

മുംബൈ: പൊലീസുകാരന്റെ ചെവി കടിച്ചുപറിച്ച നൈജീരിയക്കാരന്‌ അഞ്ചുവര്‍ഷം തടവ്‌ വിധിച്ചു. ചൊവ്വാഴ്‌ച മുംബൈ സെഷന്‍സ്‌ കോടതിയാണ്‌ ശിക്ഷ വിധിച്ചത്‌.

ഈഗ മൈക്കിള്‍(37)നെയാണ്‌ അഞ്ചുവര്‍ഷത്തെ തടവിന്‌ ശിക്ഷിച്ചത്‌. 2008 മാര്‍ച്ച 13നാണ്‌ കേസിനാസ്‌പദമായ സംഭവം നടന്നത്‌. കരഞ്ഞുകൊണ്ട്‌ ജെജെ മാര്‍ഗ്‌ പൊലീസ്‌ സ്റ്റേഷനിലേയ്‌ക്ക്‌ ഓടിവന്ന ഈഗ മദ്യപിച്ചിട്ടുണ്ടെന്ന്‌ തെറ്റിദ്ധരിച്ച്‌ ഡ്യൂട്ടിയിലുണ്ടായിരുന്ന പൊലീസുകാരന്‍ ഇയാളെ തടഞ്ഞു.

ഇതില്‍ പ്രതിഷേധിച്ചാണ്‌ ഈഗ കോണ്‍സ്‌റ്റബിള്‍ അങ്കുഷ്‌ രാമചന്ദ്രയുടെ ചെവി കടിച്ചുപറിച്ചത്‌. .യഥാര്‍ത്ഥത്തില്‍ ആരില്‍ നിന്നോ രക്ഷപ്പെടാന്‍ വേണ്ടിയായിരുന്നുവത്രേ ഈഗ സ്റ്റേഷനിലേയ്‌ക്ക നിലവിളിച്ചുകൊണ്ട്‌ ഓടിക്കയറിയത്‌.

കോണ്‍സ്‌റ്റബിളിനെ ആക്രമിച്ച ഈഗയെ അറസ്‌റ്റുചെയ്‌ത്‌ സര്‍ക്കാര്‍ ഉദ്യോഗസ്ഥനെ ഉപദ്രവിയ്‌്‌ക്കുകയും കൃത്യനിര്‍വ്വഹണത്തിന്‌ തടസ്സം സൃഷ്ടിക്കുകയും ചെയ്‌തുവെന്നും കാണിച്ച്‌ കേസ്‌ രജിസ്റ്റര്‍ ചെയ്യുകയായിരുന്നു.

ഈഗയെ ആര്‍തര്‍റോഡ്‌ ജയിലേയ്‌ക്ക്‌ കൊണ്ടുപോയി. ഇയാളുടെ പാസ്‌പോര്‍ട്ട്‌ കോടതി തടഞ്ഞുവച്ചിട്ടുണ്ട്‌. മെയ്‌ 22ന്‌ ഇയാള്‍ക്ക്‌ ജാമ്യം ലഭിച്ചെങ്കിലും ജയിലില്‍ നിന്നും പുറത്തുവരാന്‍ കഴിഞ്ഞിരുന്നില്ല. പിന്നീട്‌ കേസ്‌ പരിഗണിച്ച കോടതി ശിക്ഷവിധിയ്‌ക്കുകയായിരുന്നു.