തിരഞ്ഞെടുപ്പ്‌ വിജ്ഞാപനം പുറപ്പെടുവിച്ചു

ദില്ലി: പതിനഞ്ചാം ലോക്‌സഭാ തിരഞ്ഞെടുപ്പിന്റെ ഔപചാരിക നടപടികള്‍ക്ക്‌ തുടക്കമായി. കേരളവും ലക്ഷദ്വീപുമുള്‍പ്പെടെ ആദ്യഘട്ടത്തില്‍ വോട്ടെടുപ്പ്‌ നടക്കുന്ന 124 മണ്ഡലങ്ങളിലേയ്‌ക്കുള്ള തിരഞ്ഞെടുപ്പ്‌ വിജ്ഞാപനം രാഷ്ട്രപതി പ്രതിഭ പാട്ടീല്‍പുറപ്പെടുവിച്ചു.

കേരളമുള്‍പ്പെടെ പതിനഞ്ച്‌ സംസ്ഥാനങ്ങളിലും രണ്ട്‌ കേന്ദ്രഭരണപ്രദേശങ്ങളിലും ഏപ്രില്‍ 16നാണ്‌ തിരഞ്ഞെടുപ്പ്‌ നടക്കുക. ആദ്യഘട്ടത്തില്‍ ഏറ്റവുമധികം മണ്ഡലങ്ങളില്‍ വോട്ടെടുപ്പ്‌ നടക്കുന്ന സംസ്ഥാനം ആന്ധ്രപ്രദേശ്‌ ആണ്‌. ആന്ധ്രയിലെ 22 മണ്ഡലങ്ങളിലാണ്‌ ആദ്യഘട്ടത്തില്‍ തിരഞ്ഞെടുപ്പ്‌ നടക്കുക.

തൊട്ടുപിന്നിലാണ്‌ കേരളം. കേരളത്തില്‍ 20 മണ്ഡലങ്ങളിലാണ്‌ 16ന്‌ തിരഞ്ഞെടുപ്പ്‌ നടക്കുക. ഉത്തര്‍പ്രദേശിലെ 16, ബീഹാര്‍, മഹാരാഷ്ട്ര എന്നിവിടങ്ങളിലെ 13, ഛത്തീസ്‌ഗഡിലെ 6, അസമിലെ 3, അരുണാചല്‍ പ്രദേശ്‌, മേഘാലയ എന്നിവിടങ്ങളിലെ 2 മണ്ഡലങ്ങളിലേയ്‌ക്കും ഈ ഘട്ടത്തില്‍ തിരഞ്ഞെടുപ്പ്‌ നടക്കും.

ഇതിനൊപ്പംതന്നെ മിസോറാം, നാഗാലാന്റ്‌, ജമ്മുകശ്‌മീര്‍, മണിപ്പൂര്‍ എന്നിവിടങ്ങളിലെയും ആന്റമാന്‍ നിക്കോബാര്‍, ലക്ഷദ്വീപ്‌ ന്നെിവിടങ്ങളിലെ ഓരോ മണ്ഡലങ്ങളിലും തിരഞ്ഞെടുപ്പ്‌ നടക്കുന്നുണ്ട്‌.

സ്ഥാനാര്‍ത്ഥികളുടെ നാമനിര്‍ദ്ദേശപ്പട്ടികാ സമര്‍പ്പണവും തിങ്കളാഴ്‌ച ആരംഭിച്ചു. 31നാണ്‌ സൂക്ഷ്‌മപരിശോധന നടക്കുക. നാമനിര്‍ദ്ദേശ പത്രിക പിന്‍വലിക്കാന്‍ ഏപ്രില്‍ 2വരെ സമയമുണ്ട്‌. സമയം കൃത്യമായി രേഖപ്പെടുത്തുന്നതിന്‌ പത്രിക സമര്‍പ്പണം ഇത്തവണ വീഡിയോയില്‍ ചിത്രീകരിക്കുന്നുണ്ട്‌.