നല്കിയ ബോണസ് എഐജി തിരിച്ചെടുക്കും
വാഷിങ്ടണ്: നിക്ഷേപകര്ക്ക് നല്കിയ ബോണസിന്റെ ഒരു ഭാഗം തിരിച്ചു പിടിയ്ക്കാന് ഇന്ഷുറന്സ് ഭീമന് എഐജി തീരുമാനിച്ചു.
അഞ്ചു കോടി ഡോളറാണ് തിരിച്ചെടുക്കാന് തീരുമാനിച്ചിട്ടുള്ളതെന്ന് ന്യൂയോര്ക്ക് അറ്റോര്ണി ജനറല് ആന്ഡ്രു ക്യൂമോ അറിയിച്ചു. ഏറ്റവും കൂടുതല് ബോണസ് കൈപ്പറ്റിയ പത്തില് ഒമ്പതുപേരും ബോണസ് തിരിച്ചുനല്കാന് തയ്യാറായിട്ടുണ്ട്. അതിന് താഴെ വരുന്ന 20 പേരില് 15 പേരും ബോണസ് തിരിച്ചുനല്കുമെന്ന് ക്യൂമോ അറിയിച്ചു.
സാമ്പത്തിക മാന്ദ്യത്തെ തുടര്ന്ന് തകര്ച്ചയിലായ എഐജിയെ കരകയറ്റാന് 2000 കോടിയുടെ സഹായമാണ് അമേരിക്കന് സര്ക്കാര് നല്കിയത്. 2008ന്റെ അന്ത്യ പാദത്തില് 61 ബില്യണ് ഡോളറിന്റെ നഷ്ടമാണ് കന്പനിയ്ക്കുണ്ടായത്. ഇങ്ങനെ രൂക്ഷമായ സാന്പത്തിക പ്രതിസന്ധിക്കിടയിലും ബോണസ് നല്കിയ നടപടിയെ പ്രസിഡന്റ് ഒബാമ ശക്തമായി വിമര്ശിച്ചിരുന്നു.
നികുതിദായകരുടെ മുന്നില് ഇക്കാര്യം എങ്ങനെ ന്യായീകരിക്കുമെന്നായിരുന്നു ഒബാമ ചോദിച്ചത്. ബോണസ് നല്കുന്നതിനെതിരെ നിയമപ്രകാരമുള്ള നിയന്ത്രണങ്ങള് ഏര്പ്പെടുത്താനാകുമോ എന്നകാര്യവും ഒബാമ യുഎസ് ട്രഷറി സെക്രട്ടറിയുമായി ചര്ച്ച നടത്തിയിരുന്നു.
എന്നാല് സാമ്പത്തിക നിയന്ത്രണങ്ങള് വരുന്നതിനുമുമ്പുള്ള കരാര് പ്രകാരമാണ് ബോണസ് നല്കുന്നതെന്നായിരുന്നു എഐജി ഇക്കാര്യത്തില് സ്വീകരിച്ച നിലപാട്.