സാമ്പത്തിക മാന്ദ്യം പരിഹരിക്കപ്പെടുന്നു: ഒബാമ

വാഷിങ്‌ടണ്‍: സാമ്പത്തിക പ്രതിസന്ധിയില്‍ നിന്ന്‌ അമേരിക്ക കരകയറുന്നതിന്റെ ലക്ഷണങ്ങള്‍ കണ്ടുതുടങ്ങിയതായി പ്രസിഡന്റ്‌ ബരാക്‌ ഒബാമ.

പ്രതിസന്ധി പരിഹരിക്കുന്നതുവരെ ജനങ്ങള്‍ ക്ഷമയോടെ കാത്തിരിക്കണമെന്നും അദ്ദേഹം പറഞ്ഞു. എന്റെ ഭരണകൂടം അവതരിപ്പിക്കുന്ന ബജറ്റ്‌ സമ്പദ്‌ ഘടനയ്‌ക്ക്‌ കരുത്തുപകരുന്നതായിരിക്കും.

തൊഴിലവസരങ്ങള്‍ വര്‍ധിപ്പിക്കുന്നതിനും ഭവനമേഖലയെ പുനരുദ്ധരിക്കുന്നതിനുമുള്ള പദ്ധതികള്‍ക്കായിരിക്കും ബജറ്റില്‍ മുന്‍തൂക്കം നല്‍കുക- പ്രസിഡന്റായി സ്ഥാനമേറ്റതിന്‌ ശേഷം ചൊവ്വാഴ്‌ച രാത്രി നടത്തിയ രണ്ടാമത്തെ വാര്‍ത്താസമ്മേളനത്തിലാണ്‌ ഒബാമ ഇക്കാര്യങ്ങള്‍ പറഞ്ഞത്‌.

സാമ്പത്തിക മാന്ദ്യം പരിഹരിക്കുന്നതിനായി ജനങ്ങള്‍ ഓരോരുത്തരും പരിശ്രമിക്കേണ്ടതുണ്ട്‌. മാന്ദ്യം മറികടക്കാന്‍ ചില രാജ്യങ്ങള്‍ വളരെ കാര്യമായ ശ്രമങ്ങള്‍ നടത്തുമ്പോള്‍ ചില രാജ്യങ്ങള്‍ ഒന്നും ചെയ്യുന്നില്ല. ഇത്തരം രാജ്യങ്ങള്‍ ഇനിയെങ്കിലും ഇതിനെതിരെ ശ്രമങ്ങള്‍ നടത്തുമെന്ന്‌ കരുതുന്നു- അദ്ദേഹം പറഞ്ഞു.

ഇതിനിടെ അഫ്‌ഗാനിസ്ഥാനിലെ തീവ്രവാദികള്‍ക്ക്‌ എതിരായ പോരാട്ടം തുടരുമെന്ന്‌ ആസ്‌ത്രേലിയന്‍ പ്രധാനമന്ത്രി കെവിന്‍ റൂഡുമായി നടത്തിയ കൂടിക്കാഴ്‌ചയ്‌ക്കിടെ ഒബാമ പ്രഖ്യാപിച്ചു.

തീവ്രവാദത്തിനെതിരെ ശക്തമായ ചെറുത്തുനില്‍പ്പ്‌ നടത്തേണ്ടത്‌ അത്യാവശ്യമാണെന്നും അദ്ദേഹം പറഞ്ഞു. അഫ്‌ഗാനിസ്ഥാനിലേയ്‌ക്ക്‌ 17,000 സൈനികരെക്കൂടി അയക്കുമെന്ന്‌ യുഎസ്‌ ഭരണകൂടം പ്രഖ്യാപിച്ചിട്ടുണ്ട്‌.