പിഡിപിയുമായി വേദി പങ്കിടില്ല: ചന്ദ്രചൂഡന്‍

തിരുവനന്തപുരം: പിഡിപിയുമായി ആര്‍എസ്‌പി വേദിപങ്കിടില്ലെന്ന്‌ ജനറല്‍ സെക്രട്ടറി ടി ജെ ചന്ദ്രചൂഡന്‍ പറഞ്ഞു. തിരുവനന്തപുരത്ത്‌ കേസരി സ്‌മാരക ട്രസ്റ്റിന്റെ മുഖാമുഖം പരിപാടിയില്‍ സംസാരിക്കുകയായിരുന്നു അദ്ദേഹം.

ആര്‌ മുന്നണി വിട്ടാലും അത്‌ ക്ഷീണമാണ്‌. പിഡിപിയോടുള്ള നിലപാടില്‍ മാറ്റം വരുത്തിയിട്ടില്ല. എനിക്കെതിരെ പിഡിപി നേതാവ്‌ പൂന്തുറ സിറാജ്‌ നടത്തിയ പ്രസ്‌താവനയോട്‌ പ്രതികരിക്കാന്‍ ആഗ്രഹിക്കുന്നില്ല. പറഞ്ഞകാര്യം പിന്‍വലിക്കുന്നതായി പിഡിപി പറഞ്ഞുകഴിഞ്ഞു- അദ്ദേഹം വ്യക്തമാക്കി.

കൊല്ലം സീറ്റ്‌ തര്‍ക്കത്തില്‍ മന്ത്രിയെ പിന്‍വലിക്കുമെന്ന പാര്‍ട്ടി നിലപാട്‌ തെറ്റായിരുന്നു. സീറ്റ്‌ പ്രശ്‌നത്തില്‍ പാര്‍ട്ടിയ്‌ക്കുപറ്റിയ ഒരു പാളിച്ചയാണിത്‌. സീറ്റ്‌ ലഭിച്ചില്ലെങ്കില്‍ മന്ത്രിയെ പിന്‍വലിക്കുമെന്ന്‌ പറയാന്‍ പാടില്ലായിരുന്നു. ഒരു സീറ്റ്‌ കിട്ടിയില്ലെങ്കില്‍ മുന്നണി വിടുന്ന പാര്‍ട്ടിയല്ല ആര്‍എസ്‌പി.

കോഴിക്കോട്‌ സീറ്റ്‌ ജനതാദളിന്‌ തന്നെ നല്‍കേണ്ടിയിരുന്നു. അവര്‍കൂടി മുന്നണിയില്‍ വേണം. കേരളത്തില്‍ മുന്നണിയുടെ ജയസാധ്യത കുറയില്ല-അദ്ദേഹം പറഞ്ഞു.

കേന്ദ്രത്തില്‍ യുപിഎ തര്‍ന്നുകഴിഞ്ഞു. പസ്വാനും ലാലു പ്രസാദ്‌ യാദവും മുലായം സിങ്‌ യാദവും ഒന്നിച്ച്‌ മത്സരിക്കാന്‍ തീരുമാനിച്ചതോടെയാണ്‌ യുപിഎയുടെ തകര്‍ച്ച പൂര്‍ണമായത്‌. ഡിഎംകെ മാത്രമാണ്‌ ഇപ്പോള്‍ യുപിഎ ഘടകകക്ഷി.

ഇത്‌ കേന്ദ്രത്തില്‍ മൂന്നാം മുന്നണി സര്‍ക്കാര്‍ വരാനുള്ള സാധ്യത വര്‍ധിപ്പിക്കുന്നു. മൂന്നാം മുന്നണി ശക്തിപ്പെടാനുള്ള സാഹചര്യം ഇപ്പോഴുണ്ട്‌. ഇടതുപക്ഷ പാര്‍ട്ടികളാണ്‌ മൂന്നാം മുന്നണിയുടെ കാതല്‍. മായാവതിയുടെ ആത്യന്തികമായ ലക്ഷ്യം പ്രധാനമന്ത്രിയാവുകയാണ്‌. ഇത്‌ ഇടത്‌ പാര്‍ട്ടികള്‍ക്ക്‌ സ്വീകാര്യമല്ല- ചന്ദ്രചൂഡന്‍ വ്യക്തമാക്കി.