വിഎസിന് ആത്മാര്‍ത്ഥതയില്ല: ഉമ്മന്‍ ചാണ്ടി

കാലടി: ലാവലിന്‍ കേസില്‍ മുഖ്യമന്ത്രി വി എസ് അച്യുതാനന്ദന്‍ ആത്മാര്‍ത്ഥതയില്ലാതെയാണ് പ്രവര്‍ത്തിക്കുന്നതെന്ന് പ്രതിപക്ഷ നേതാവ് ഉമ്മന്‍ചാണ്ടി കുറ്റപ്പെടുത്തി. ഈ കേസ് ജനങ്ങളുടെ മനസ്സില്‍ നിന്നും മാഞ്ഞു പോകില്ല. കേസിനെക്കുറിച്ച് അന്വേഷിക്കുമെന്ന് പറയുന്നതല്ലാതെ മുഖ്യമന്ത്രി ഒന്നും പ്രവര്‍ത്തിയില്‍ കൊണ്ടുവരുന്നില്ലെന്നും അദ്ദേഹം ആരോപിച്ചു.

മരതക ശിവലിംഗ കവര്‍ച്ച ചെയ്യപ്പെട്ട കാലടി ആദിശങ്കര ജന്‍മഭൂമി ക്ഷേത്രം സന്ദര്‍ശിച്ചതിനു ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.

പ്രോസിക്യൂഷന് അനുമതി ലഭിയ്ക്കാത്തത് മൂലം ലാവലിന്‍ കേസ് ചീറ്റിപ്പോയെന്ന് പിണറായി വിജയന്‍ കരുതേണ്ടതില്ല. കേസ് തെളിയിക്കാന്‍ മുഖ്യമന്ത്രി തന്റെ അധികാരം വിനിയോഗിക്കണം.

കാലടി ക്ഷേത്രത്തില്‍ മോഷണം നടത്തിയവരെ കണ്ടെത്താന്‍ സര്‍ക്കാര്‍ അന്താരാഷ്ട്ര ഏജന്‍സിയെഅന്വേഷണത്തിനായി നിയോഗിക്കണമെന്നും ഉമ്മന്‍ചാണ്ടി ആവശ്യപ്പെട്ടു. കാലടി ക്ഷേത്രത്തില്‍ നിന്നും മോഷ്ടയ്കക്പ്പെട്ടത് ഭാരതത്തിന്റെ അമൂല്യ നിധിയാണെന്നും പ്രതിപക്ഷ നേതാവ് പറഞ്ഞു.

ശനിയാഴ്ചയാണ് അഞ്ച് കോടിയോളം വിലമതിക്കുന്ന മരതകശിവലിംഗവും പൂജാസാമഗ്രികളും ക്ഷേത്രത്തില്‍ നിന്ന് മോഷ്‌ടിക്കപ്പെട്ടത്.