ഹൈക്കോടതി പരാമര്ശം: സര്ക്കാര് ഹര്ജി നല്കി
ദില്ലി:സംസ്ഥാനത്ത് ക്രമസമാധാനം തകര്ന്നുവെന്ന ഹൈക്കോടതി നിരീക്ഷണത്തിനെതിരെ സംസ്ഥാന സര്ക്കാര് സുപ്രീംകോടതിയെ സമീപിച്ചു.
മതനേതാവ് റഹീം പൂക്കുടശ്ശേരി വധശ്രമക്കേസിലെ പ്രതികളുടെ ജാമ്യാപേക്ഷ തള്ളിക്കൊണ്ട് ഹൈക്കോടതി ജഡ്ജി ജസ്റ്റിസ് വി രാംകുമാര് ആണ് സംസ്ഥാന സര്ക്കാരിനെ രൂക്ഷമായി വിമര്ശിച്ചത്. സംസ്ഥാനത്ത് ക്രമസമാധാനം പൂര്ണമായി തകര്ന്നിരിക്കുകയാണെന്നും, തിരരഞ്ഞെടുപ്പു കളിയില് മുഴുകിയിരിക്കുന്ന സര്ക്കാര് ഇതൊന്നും ഗൗനിയ്ക്കുന്നില്ലെന്നുമായിരുന്നു ഹൈക്കോടതി നിരീക്ഷണം.
ഇക്കാര്യത്തില് സര്ക്കാര് കര്ശന നടപടി സ്വീകരിച്ചില്ലെങ്കില് കോടതിക്ക് ഇടപെടേണ്ടി വരുമെന്നും ജസ്റ്റിസ് രാംകുമാര് മുന്നറിയിപ്പ് നല്കിയിരുന്നു. ഇത് വ്യാപകമായി ചര്ച്ച ചെയ്യപ്പെട്ട സാഹചര്യത്തിലാണ് സര്ക്കാര് മേല്ക്കോടതിയെ സമീപിച്ചത്.
സമാനമായ പരാമര്ശം ഹൈക്കോടതി മുമ്പും നടത്തിയിട്ടുണ്ടെന്നും അതിനാല് ഈ പരാമര്ശം നീക്കിക്കിട്ടണമെന്നും അഭ്യര്ത്ഥിച്ചാണ് സുപ്രീംകോടതിയില് ഹര്ജി നല്കിയിരിയ്ക്കുന്നത്. നേരത്തെ ഇതേ രീതിയില് നടത്തിയ ഹൈക്കോടതി പരാമര്ശം സുപ്രീം കോടതി റദ്ദാക്കിയിരുന്നു.
ഹൈക്കോടതി പരാമര്ശത്തിനെതിരെ, മേല്ക്കോടതിയെ സമീപിക്കാന് കഴിഞ്ഞ മന്ത്രിസഭാ യോഗമാണ് തീരുമാനമെടുത്തത്.