പത്രിക പിന്‍വലിക്കല്‍: സമയം തീരുന്നു

തിരുവനന്തപുരം: ആദ്യഘട്ട വോട്ടെടുപ്പ് നടക്കുന്ന മണ്ഡലങ്ങളില്‍ സമര്‍പ്പിച്ച നാമനിര്‍ദ്ദേശപത്രിക പിന്‍വലിക്കാനുള്ള അവസാനദിവസം വ്യാഴാഴ്ച മൂന്ന് മണിയോടെ അവസാനിയ്ക്കും. ഇത് കഴിയുന്നതോടെ സംസ്ഥാനത്തെ തിരഞ്ഞെടുപ്പ് ചിത്രം ഏറെക്കുറെ വ്യക്തമാകും. കേരളമുള്‍പ്പെടെ 15 സംസ്ഥാനങ്ങളിലാണ് ആദ്യഘട്ട വോട്ടെടുപ്പ് നടക്കുന്നത്.

സംസ്ഥാനത്ത് 20 മണ്ഡലങ്ങളിലായി 239 സ്ഥാനാര്‍ത്ഥികളാണ് ഇപ്പോള്‍ രംഗത്തുള്ളത്. ആകെ സമര്‍പ്പിയ്ക്കപ്പെട്ട 324 പത്രികകളില്‍ 74 എണ്ണം സൂക്ഷ്മ പരിശോധനയില്‍ തള്ളിപ്പോയിരുന്നു. പത്രിക തള്ളപ്പെട്ടവരില്‍ പ്രധാന സ്ഥാനാര്‍ത്ഥികളാരുമില്ല.

21 പേര്‍ മത്സരിയ്ക്കുന്ന കോട്ടയം മണ്ഡലത്തിലാണ് ഏറ്റവുമധികം സ്ഥാനാര്‍ത്ഥികളുള്ളത്. രണ്ടാം സ്ഥാനത്തുള്ള കോഴിക്കോട് 19 പേര്‍ മത്സര രംഗത്തുണ്ട്. ഏറ്റവും കുറവ് മത്സരാര്‍ത്ഥികളുള്ളത് മലപ്പുറം മണ്ഡലത്തിലാണ്. എല്‍ഡിഎഫ്, യുഡിഎഫ്, ബിജെപി കക്ഷികള്‍ക്ക് പുറമെ ബിഎസ് പിയും മലപ്പുറത്ത് മത്സരിയ്ക്കുന്നുണ്ട്.

പത്രിക പിന്‍വലിയ്ക്കാനുള്ള സമയം അവസാനിയ്ക്കാനിരിയ്ക്കെ അപരന്‍‌മാരെ മത്സരത്തില്‍ നിന്നും പിന്തിരിപ്പിയ്ക്കാന്‍ള്ള ശ്രമങ്ങള്‍ ഇരുമുന്നണികളും കൊണ്ടു പിടിച്ച് നടത്തുന്നുണ്ട്.