സീറ്റ്‌ കിട്ടാത്തതില്‍ വിഷമമില്ല: നഗ്മ

മുംബൈ: കോണ്‍ഗ്രസ്‌ ടിക്കറ്റില്‍ മത്സരിയ്‌ക്കാന്‍ കഴിയാത്തതില്‍ നിരാശയില്ലെന്ന്‌ നടി നഗ്മ. നഗ്മ മത്സരിയ്‌ക്കുമെന്ന്‌ കരുതപ്പെട്ടിരുന്ന മുംബൈ നോര്‍ത്ത്‌ വെസ്‌റ്റ്‌ മണ്ഡലത്തില്‍ മുതിര്‍ന്ന നേതാവ്‌ ഗുരുദാസ്‌ കമ്മത്ത്‌ സ്ഥാനാര്‍ത്ഥിയാകുമെന്ന്‌ കോണ്‍ഗ്രസ്‌ കഴിഞ്ഞ ദിവസം പ്രഖ്യാപിച്ചിരുന്നു.

കഴിഞ്ഞ തവണ കോണ്‍ഗ്രസ്‌ ടിക്കറ്റില്‍ ഇവിടെ നിന്നും നടന്‍ ഗോവിന്ദയാണ്‌ മത്സരിച്ച്‌ ജയിച്ചത്‌. എന്നാല്‍ പാര്‍ട്ടിയുമായി ഗോവിന്ദ ഇടഞ്ഞതോടെ പുതിയൊരാളെ സ്ഥാനാര്‍ത്ഥിയാക്കാന്‍ കോണ്‍ഗ്രസ്‌ തീരുമാനിച്ചിരുന്നു. ഇതിനിടെയാണ്‌ മണ്ഡലത്തില്‍ സ്ഥാനാര്‍ത്ഥിയാകാന്‍ തയാറാണെന്ന്‌ നഗ്മ കോണ്‍ഗ്രസ്‌ നേതൃത്വത്തെ അറിയിച്ചത്‌.

ഉത്തരേന്ത്യന്‍ വോട്ടുകള്‍ ലക്ഷ്യമാക്കിയാണ്‌ നഗ്മയെ തഴഞ്ഞ്‌ ഗുരുദാസ്‌ കമ്മത്തിനെ സ്ഥാനാര്‍ത്ഥിയാക്കാന്‍ കോണ്‍ഗ്രസ്‌ തീരുമാനിച്ചതെന്നാണ് സൂചന

അവസാന നിമിഷം വരെ സ്ഥാനാര്‍ത്ഥിയാക്കാന്‍ പരിഗണിച്ചതില്‍ കോണ്‍ഗ്രസ്‌ പ്രവര്‍ത്തക എന്ന രീതിയില്‍ സന്തോഷമുണ്ടെന്ന്‌ നഗ്മ പറഞ്ഞു. പാര്‍ട്ടി എല്ലാ സ്ഥാനാര്‍ത്ഥികളെയും പരിഗണിച്ചതിന്‌ ശേഷം തിരഞ്ഞെടുപ്പ് പ്രചാരണത്തില്‍ സജീവമാകുമെന്നും നഗ്മ വ്യക്തമാക്കി.