എംആര്‍ മുരളി ഉപവാസം നടത്തുന്നു

പാലക്കാട്: സിപിഎം ജനാധിപത്യ വിരുദ്ധ കൈയേറ്റം നടത്തുകയാണെന്ന് ആരോപിച്ച് പാലക്കാട് ലോക്‌സഭാ മണ്ഡലത്തിലെ ഇടതുപക്ഷ ഏകോപന സമിതി സ്ഥാനാര്‍ത്ഥി എംആര്‍ മുരളി നടത്തുന്ന ഉപവാസം ആരംഭിച്ചു. രാവിലെ 11 മുതല്‍ വൈകിട്ട് അഞ്ച് വരെ പാലക്കാട്‌ കലക്‌ടറേറ്റിന് മുന്നിലാണ്‌ ഉപവാസ സമരം.

ഇടതുപക്ഷ ഏകോപന സമിതിയ്ക്ക് കിട്ടുന്ന ജനപിന്തുണ കണ്ട് വിറളി പൂണ്ട സിപിഎം, തനിക്കും പാര്‍ട്ടി പ്രവര്‍ത്തകര്‍ക്കുമെതിരെ അക്രമം അഴിച്ചു വിട്ടിരിയ്ക്കുകയാണ്.കഴിഞ്ഞ ദിവസം സമിതിയുടെ പ്രവര്‍ത്തകനായ കെബി ഗുപ്‌തന്റെ വീട്ടില്‍ കയറി ഗുണ്ടാ സംഘം ഭീഷണി മുഴക്കിയെന്ന് മുരളി ആരോപിച്ചു.

പോലീസിന്റെ മൗനാനുവാദത്തോടെയാണ് സിപിഎമ്മിന്റെ ഗുണ്ടാരാജ് നടക്കുന്നത്.ഇതിനെതിരെ തിരഞ്ഞെടുപ്പ് കമ്മീഷനെ സമീപിക്കും. ഏകോപന സമിതിയുടെ പോസ്റ്ററുകളും ബാനറുകളും സിപിഎം പ്രവര്‍ത്തകര്‍ വ്യാപകമായി നശിപ്പിയ്ക്കുന്നുണ്ടെന്നും മുരളി കുറ്റപ്പെടുത്തി.