തിരഞ്ഞെടുപ്പ്: ലോഡ്‌ഷെഡിംഗ് പിന്‍വലിച്ചു

തിരുവനന്തപുരം: ലോക്സഭാ തിരഞ്ഞെടുപ്പ് പരിഗണിച്ച് ലോഡ്‌ഷെഡിംഗ് താല്‍ക്കാലികമായി പിന്‍വലിച്ചു. തിങ്കളാഴ്ച മുതല്‍ ഈ മാസം 17 വരെ ലോഡ്‌ഷെഡിംഗ് പിന്‍വലിക്കാനാണ് വൈദ്യുത ബോര്‍ഡ് തീരുമാനിച്ചിരിക്കുന്നത്.

തിരഞ്ഞെടുപ്പ് ക്രമീകരണങ്ങള്‍ക്കും മറ്റുമായി ആഭ്യന്തര മന്ത്രാലയവും ജില്ലാ ഭരണാധികാരികളും വിവിധ രാഷ്ട്രീയ പാര്‍ട്ടികളും ലോഡ് ഷെഡിങ് പിന്‍വലിയ്ക്കണമെന്ന് വൈദ്യുത ബോര്‍ഡിനോട് അഭ്യര്‍ത്ഥിച്ചിരുന്നു. തിങ്കളാഴ്ച ചേര്‍ന്ന ബോര്‍ഡ് യോഗം ഇത് അംഗീകരിയ്ക്കുകയായിരുന്നു.

എസ്എസ്എല്‍സി പരീക്ഷയോനുബന്ധിച്ച് ലോഡ്‌ഷെഡിംഗ് ഒഴിവാക്കിയിരുന്നു. വൈദ്യുത പ്രതിസന്ധി ഉണ്ടായിരുന്നെങ്കിലും സംസ്ഥാനത്തെ കാര്യങ്ങള്‍ നല്ല രീതിയില്‍ മുന്നോട്ടു കൊണ്ടുപോകാന്‍ വൈദ്യുത ബോര്‍ഡിന് കഴിഞ്ഞിരുന്നു.

കേന്ദ്ര പൂളില്‍ നിന്നുള്ള വൈദ്യുതി വിഹിതം വര്‍ദ്ധിപ്പിച്ച സാഹചര്യത്തില്‍ വരുന്ന രണ്ടു മാസത്തേക്ക് ലോഡ് ഷെഡിങ് പിന്‍വലിയ്ക്കുമെന്നും സൂചനയുണ്ട്. 17 വരെയുള്ള അവസ്ഥ വിലയിരുത്തിയ ശേഷം ഇക്കാര്യത്തില്‍ അന്തിമ തീരുമാനം എടുക്കുക.