സിഖുകാരുടെ പിന്തുണയുണ്ടെന്ന്‌ ടൈറ്റ്‌ലര്‍

ദില്ലി: കേന്ദ്രആഭ്യന്തരമന്ത്രി പി. ചിദംബരത്തിനുനേരെ ചെരുപ്പെറിഞ്ഞ മാധ്യമപ്രവര്‍ത്തകന്‍ ജര്‍ണയില്‍ സങിന്റെ നടപടി രാഷ്ട്രീയ പ്രേരിതമാണെന്ന്‌ സിഖ്‌ കലാപക്കേസില്‍ കുറ്റവിമുക്തനാക്കപ്പെട്ട കോണ്‍ഗ്രസ്‌ നേതാവ്‌ ജഗ്‌ദീഷ്‌ ടൈറ്റ്‌ലര്‍.

തന്റെ സ്ഥാനാര്‍ത്ഥിത്വം റദ്ദാക്കുമെന്ന വാര്‍ത്ത അടിസ്ഥാന രഹിതമാണെന്നും തനിക്ക്‌ സിഖുകാരുടെ പിന്തുണയുണ്ടെന്നും അദ്ദേഹം പറഞ്ഞു.

സിഖ്‌ കലാപക്കേസില്‍ ടൈറ്റ്‌ലറെ സിബിഐ കുറ്റവിമുക്തനാക്കിയതില്‍ പ്രതിഷേധിച്ചാണ്‌ ജര്‍ണയില്‍ ചൊവ്വാഴ്‌ച ചിദംബരത്തിന്‌ നേരെ ചെരുപ്പെറിഞ്ഞത്‌. ഇതിനിടെ സിഖ്‌ സമുദായത്തെ പ്രീണിപ്പിക്കാനായി കലാപക്കേസില്‍ ആരോപിതരായ ടൈറ്റ്‌ലറുടെയും സജ്ജന്‍ കുമാറിന്റെയും സ്ഥാനാര്‍ത്ഥിത്വത്തെക്കുറിച്ച്‌ കോണ്‍ഗ്രസ്‌ പുരനാരാലോചന നടത്തുന്നതായി റിപ്പോര്‍ട്ടുകളുണ്ട്‌.

എന്നാല്‍ ഇതിനിടെ ഇരുസ്ഥാനാര്‍ത്ഥികളും തങ്ങളുടെ മണ്ഡലങ്ങളില്‍ പ്രചാരണപരിപാടികള്‍ തുടരുന്നുമുണ്ട്‌. വടക്കുകിഴക്കന്‍ ദില്ലിയിലെ സ്ഥാനാര്‍ത്ഥിയായ ടൈറ്റ്‌ലര്‍ ബുധനാഴ്‌ച രാവിലെ സിഖ്‌ സമുദായത്തിന്റെ ചടങ്ങില്‍ പങ്കെടുത്ത ശേഷമാണ്‌ തന്റെ സ്ഥാനാര്‍ത്ഥിത്വം സംബന്ധിച്ച്‌ അനിശ്ചിതത്വങ്ങളൊന്നുമില്ലെന്ന്‌ പറഞ്ഞത്‌.

ചിദംബരത്തെ ചെരിപ്പെറിഞ്ഞ ജര്‍ണയില്‍ അകാലിദള്‍ അനുയായിയാണെന്നും ടൈറ്റ്‌ലര്‍ പറഞ്ഞു.