സന്തോഷ് മാധവനെ 20 ന് ചോദ്യം ചെയ്യും
കൊച്ചി: ലൈംഗികപീഡനം, സാമ്പത്തിക തട്ടിപ്പ് തുടങ്ങിയ കേസുകളുമായി ബന്ധപ്പെട്ട് ജയിലില് കഴിയുന്ന വിവാദസ്വാമി സന്തോഷ് മാധവനെ ഏപ്രില് 20ന് കോടതി ചോദ്യം ചെയ്യും.
സാക്ഷിമൊഴികളുടെ അടിസ്ഥാനത്തിലാണ് ചോദ്യം ചെയ്യല്. അമ്പതോളം സാക്ഷികളെയാണ് പ്രോസിക്യൂഷന് വിസ്തരിച്ചത്. ഇതിനിടെ സന്തോഷ് മാധവന് സമര്പ്പിച്ച ജാമ്യാപേക്ഷ ഹൈക്കോടതി ബുധനാഴ്ച വീണ്ടും തള്ളി.
2008 മെയ് മാസത്തിലാണ് സന്തോഷ് മാധവന് അറസ്റ്റിലായത്. അന്നുമുതല് ഇയാള് ജയിലില് കഴിയുകയാണ്. സുപ്രീം കോടതിയും സന്തോഷ് നല്കിയ ജാമ്യാപേക്ഷ തള്ളുകയായിരുന്നു.
പ്രായപൂര്ത്തിയാകാത്തവരുള്പ്പെടെ നാല് പെണ്കുട്ടികളെ സഹായിക്കാനെന്ന പേരില് വിളിച്ചുകൊണ്ടുപോയി സന്തോഷ് ലൈംഗികമായി പീഡിപ്പിച്ചുവെന്നാണ് കേസ്. ഇയാളുടെ ഡ്രൈവര് തോമസാണ് ഇതിനുള്ള സഹായങ്ങള് ചെയ്തുകൊടുത്തത്.
തോമസും കേസില് പ്രതിയാണ്. എന്നാല് ഇയാള് മാപ്പുസാക്ഷിയാകാന് സാധ്യതയുണ്ട്. പീഡനത്തിന് വിധേയരായ പെണ്കുട്ടികളില് മൂന്നു പേര് വിചാരണ വേളയില് കൂറുമാറിയിരുന്നു. ഒരു പെണ്കുട്ടി മാത്രമാണ് പ്രോസിക്യൂഷന്റെ ആരോപണങ്ങള് ശരിവച്ചത്.
ബുധനാഴ്ചയോടെ കേസിലെ സാക്ഷിവിസ്താരം കഴിഞ്ഞു. കേസന്വേഷണ ഉദ്യോഗസ്ഥനായ സര്ക്കിള് ഇന്സ്പെക്ടര് ജി വേണുവിന്റെ വിസ്താരമാണ് ഏറ്റവും അവസാനം നടന്നത്. വിസ്താരത്തിനിടെ 102 രേഖകള് പ്രോസിക്യൂഷന് തെളിവുകളായി ഹാജരാക്കിയിട്ടുണ്ട്. എട്ടുരേഖകളാണ് പ്രതിഭാഗം ഹാജരാക്കിയിരിക്കുന്നത്.
സന്തോഷ് പെണ്കുട്ടികലെ പീഡിപ്പിക്കുന്നതിന്റെ ദൃശ്യങ്ങള് ചീത്രീകരിച്ച സിഡികളടക്കം തെളിവുകളായി സമര്പ്പിച്ചിട്ടുണ്ട്. വിചാരണയുടെ ഭാഗമായി ജഡ്ജി ഈ സിഡി കാണുകയും തെളിവുകളിലേയ്ക്ക് എണ്ണപ്പെടുത്തുകയും ചെയ്തിരുന്നു.