ഇസ്രയേല്‍ ബന്ധത്തിന്‌ തെളിവുണ്ട്‌: ഉമ്മന്‍ചാണ്ടി

കൊച്ചി: പശ്ചിമബംഗാള്‍ മുഖ്യമന്ത്രിയായിരുന്ന ജ്യോതി ബസു ഇസ്രയേലില്‍ നിന്നും നിക്ഷേപം തേടിയതിന്‌ തെളിവുകളുമായി പ്രതിപക്ഷ നേതാവ്‌ ഉമ്മന്‍ചാണ്ടി രംഗത്ത്‌.

മുഖ്യമന്ത്രിയായിരുന്ന കാലത്ത്‌ വാണിജ്യ-വ്യവസായ പങ്കാളിത്തത്തിനായി ചര്‍ച്ചകള്‍ നടത്തുന്നതിന്‌ ജ്യോതി ബസു ഇസ്രയേല്‍ സന്ദര്‍ശിച്ചിരുന്നുവെന്ന്‌ റിപ്പോര്‍ട്ടുകള്‍ ഉദ്ധരിച്ചുകൊണ്ട്‌ അദ്ദേഹം ചൂണ്ടിക്കാട്ടി.

മറ്റാരേക്കാളും കൂടുതലായി ഇസ്രയേലുമായി ബന്ധമുണ്ടാക്കാന്‍ ശ്രമിച്ചത്‌ സിപിഎമ്മാണ്‌. ആന്റണിയും വയലാര്‍ രവിയുമല്ല ഇക്കാര്യത്തില്‍ സിപിഎം ജനറല്‍ സെക്രട്ടറി പ്രകാശ്‌ കാരാട്ടാണ്‌ സത്യാവസ്ഥ വെളിപ്പെടുത്തേണ്ടത്‌. 1998ല്‍ സോമനാഥ്‌ ചാറ്റര്‍ജിയും 2000ത്തില്‍ ജ്യോതി ബസുവും ഇസ്രയേല്‍ സന്ദര്‍ശിച്ചത്‌ പൊളിറ്റ്‌ ബ്യൂറോയുടെ അറിവില്ലാതെയാണോ- ഉമ്മന്‍ചാണ്ടിചോദിച്ചു.

എറണാകുളം പ്രസ്‌ക്ലബിന്റെ മുഖാമുഖം പരിപാടിയില്‍ സംസാരിക്കുകയായിരുന്നു ഉമ്മന്‍ചാണ്ടി. ഇടതുപക്ഷം ഭരിക്കുന്ന പശ്ചിമബംഗാളില്‍ ഇസ്രയേല്‍ നിക്ഷേപമുള്ള ഒട്ടേറെ പദ്ധതികളുണ്ടെന്ന ആരോപണം തെളിയിക്കാനായി പ്രകാശ്‌ കാരാട്ട്‌ എകെ ആന്റണിയെ വെല്ലുവിളിച്ചിരുന്നു.

ഇസ്രയേലുമായുള്ള ആയുധ ഇടപാടികള്‍ അഴിമതിയുണ്ടെന്ന ഇടതുപക്ഷത്തിന്റെ ആരോപണത്തെത്തുടര്‍ന്നാണ്‌ കോണ്‍ഗ്രസ്‌ ബംഗാളില്‍ ഇസ്രയേല്‍ നിക്ഷേപമുണ്ടെന്നും സിപിഎമ്മിന്‌ ഇസ്രയേല്‍ ബന്ധമുണ്ടെന്നുമുള്ള മറുവാദവുമായി രംഗത്തെത്തിയത്‌.