അമേരിക്കയില് കാട്ടുതീയും ചുഴലിക്കാറ്റും; 8 മരണം
ചിക്കാഗോ: അമേരിക്കയുടെ തെക്കന് ഭാഗങ്ങളില് ചുഴലിക്കാറ്റും കാട്ടുതീയും നാശം വിതയ്ക്കുന്നു. ദുഖവെള്ളി ദിനത്തിലും തുടര്ന്നുമുണ്ടായ ചുഴലിക്കാറ്റിലും കാട്ടുതീയിലും എട്ടുപേര് മരിയ്ക്കുകയും മുപ്പതോളം പേര്ക്ക് പരുക്കേല്ക്കുകയും ചെയ്തു.
നൂറോളം വീടുകള് കാട്ടുതീയില് നശിക്കുകയും കാറ്റില് തകരുകയും ചെയ്തിട്ടുണ്ട്. ചുഴലിക്കാറ്റിനെത്തുടര്ന്ന് വൈദ്യുതി ബന്ധം വിച്ഛേദിക്കപ്പെടുകയും വാര്ത്താവിനിമയ സംവിധാനങ്ങള് തകരാറിലാവുകയും ചെയ്തിട്ടുണ്ട്.
കാട്ടുതീ ശമിപ്പിക്കാനുള്ള ശ്രമങ്ങള് തുടരുകയാണ്. ശക്തമായ കാറ്റുള്ളതുകൊണ്ട് കാട്ടുതീ അതിവേഗം പടര്ന്നുപിടിക്കുകയാണ്. 40,000 ഹെക്ടര് വനപ്രദേശത്ത് കാട്ടുതീ പടര്ന്നതായി ടെക്സസ് ഫോറസ്റ്റ് സര്വീസ് അധികൃതര് പറഞ്ഞു.
ഡാലസിന് സമീപമുള്ള രണ്ടു ചെറു പട്ടണങ്ങളിലാണ് കാട്ടുതീ കൂടുതല് നാശം വിതച്ചത്. ഏതാനും ദിവസം മുമ്പ് അര്ക്കന്സാസിന് സമീപം മീനയിലുണ്ടായ ശക്തമായ ചുഴലിക്കാറ്റില് മൂന്നുപേര് മരിച്ചിരുന്നു.