സത്യത്തെ ടെക് മഹീന്ദ്ര ഏറ്റെടുക്കുന്നു

ദില്ലി: സാമ്പത്തിക ക്രമക്കേടിനെത്തുടര്‍ന്ന്‌ പ്രതിസന്ധിയിലായ പ്രമുഖ ഐടി കമ്പനി സത്യം കമ്പ്യൂട്ടേഴ്‌സിനെ ടെക്‌ മഹീന്ദ്ര ഏറ്റെടുക്കുന്നു.

സത്യത്തിന്റെ 31ശതമാനം ഓഹരികള്‍ ഏറ്റെടുക്കുന്നതിനായി കൂടിയ തുകയ്‌ക്കുള്ള ടെണ്ടര്‍ സമര്‍പ്പിച്ചത്‌ ടെക്‌ മഹീന്ദ്രയാണ്‌. മഹീന്ദ്രയും ബ്രിട്ടീഷ്‌ ടെലികോമും ചേര്‍ന്ന കമ്പനിയാണ്‌ ടെക്‌ മഹീന്ദ്ര.

എല്‍ആന്റ്‌ ടി ആയിരിക്കും സത്യത്തെ ഏറ്റെടുക്കുകയെന്ന്‌ സൂചനകളുണ്ടായിരുന്നെങ്കിലും ടെണ്ടറില്‍ കൂടുതല്‍ തുക വാഗ്‌ദാനം ചെയ്‌തത്‌ ടെക്‌ മഹീന്ദ്രയായിരുന്നു.

ഒരു ഓഹരിയ്‌ക്ക്‌ 58 രൂപ നിരക്കില്‍ നല്‍കിയുള്ള ഏറ്റെടുക്കലിനാണ്‌ ടെക്‌ മഹീന്ദ്ര തയ്യാറായിരിക്കുന്നത്‌. ഈ നിരക്കിലാണെങ്കില്‍ സത്യത്തിന്റെ 31 ശതമാനം ഓഹരികള്‍ വാങ്ങുന്നതിനായി കമ്പനി 1757 കോടി രൂപ നല്‍കേണ്ടിവരും.

പുതിയ ഡയറക്ടര്‍ ബോര്‍ഡ്‌ അടുത്തയാഴ്‌ച നിലവില്‍വരുമെന്ന്‌ അറിയുന്നു. എല്‍ആന്റ്‌ ടി ഒരു ഓഹരിക്ക്‌ 49.50 രൂപ നിരക്കിലായിരുന്നുവത്രേ ടെണ്ടര്‍ നല്‍കിയത്‌.