ഇന്‍ഫോസിസിന്റെ വരുമാനം കുറഞ്ഞു

ബാംഗ്ലൂര്‍: പ്രമുഖ ഐടി സ്ഥാപനമായ ഇന്‍ഫോസിസ്‌ ടെക്‌നോളജീസിന്റെ ലാഭത്തില്‍ ഇടിവ്‌. മൂന്നാം പാദത്തെ അപേക്ഷിച്ച്‌ കമ്പനിയുടെ ലാഭത്തില്‍ 1.7 ശതമാനത്തിന്റെയും വരുമാനത്തില്‍ 2.6 ശതമാനത്തിന്റെയും കുറവുണ്ടായതായി കമ്പനിയുടെ റിപ്പോര്‍ട്ടില്‍ പറയുന്നു.

കമ്പനിയുടെ വരുമാനം മൂന്നാം പാദത്തിലെ 5766 കോടി രൂപയില്‍ നിന്നും 5735കോടിയായാണ്‌ കുറഞ്ഞിരിക്കുന്നത്‌. അതേസമയം വാര്‍ഷിക വരുമാനത്തില്‍ 24 ശതമാനം വര്‍ധന രേഖപ്പെടുത്തിയിട്ടുണ്ടെന്നും റിപ്പോര്‍ട്ടില്‍ പറയുന്നു.

2008-09 സാമ്പത്തിക വര്‍ഷത്തിന്റെ അവസാനപാദത്തില്‍ കമ്പനിയുടെ പ്രവര്‍ത്തന ലാഭം 1613കോടി രൂപയാണ്‌. വാര്‍ഷികാടിസ്ഥാനത്തില്‍ 29 ശതമാനം വര്‍ധനയുണ്ടെങ്കിലും മൂന്നാം പാദത്തിലെ 1641 കോടിയേക്കാള്‍ കുറവാണിത്‌.

ആഗോള സാമ്പത്തിക മാന്ദ്യമാണ്‌ കമ്പനിയുടെ പ്രവര്‍ത്തന ലാഭത്തില്‍ കുറവുണ്ടാകാന്‍ കാരണമെന്നാണ്‌ അധികൃതര്‍ പറയുന്നത്‌.

എന്നാല്‍ മറ്റു മിക്ക പ്രമുഖ കമ്പനികളുടെയും പ്രവര്‍ത്തന ലാഭം കുറയുന്നുവെന്ന റിപ്പോര്‍ട്ടുകള്‍ പുറത്തുവരുമ്പോഴും ഇന്‍ഫോസിസിന്റെ പ്രവര്‍ത്തന ലാഭത്തില്‍ ഇതേവരെ കാര്യമായി കുറവുണ്ടായിരുന്നില്ല.

പ്രവര്‍ത്തന മികവിന്റെ അടിസ്ഥാനത്തില്‍ ഇന്‍ഫോസിസില്‍ നിന്നും 2100 പേരെ പിരിച്ചുവിട്ടതായി ഏതാനും ദിവസം മുമ്പ്‌ വാര്‍ത്ത വന്നിരുന്നു.