കസബിന്റെ വിചാരണ തുടങ്ങി
മുംബൈ: മുംബൈ ഭീകരാക്രമണക്കേസില് പിടിയിലായ പാക് തീവ്രവാദി അജ്മല് കസബിന്റെ വിചാരണ പ്രത്യേക കോടതിയില് തുടങ്ങി.
ആര്തര് റോഡ് ജയിലിനുള്ളില് തയ്യാറാക്കിയ പ്രത്യേക മുറിയിലാണ് വിചാരണ നടക്കുന്നത്. വിചാരണ നടക്കുന്ന സാഹചര്യം കണക്കിലെടുത്ത് ജയിലിലും പരിസരത്തും വന് സുരക്ഷാ സന്നാഹങ്ങള് ഒരുക്കിയിട്ടുണ്ട്.
കസബിന് വേണ്ടി ഹാജരാകുന്ന വക്കീല് അജ്ഞലി വാഗ്മെരെയ്ക്ക് ഇസഡ് കാറ്റഗറി സുരക്ഷയാണ് ഏര്പ്പെടുത്തിയിരിക്കുന്നത് പ്രത്യേക രീതിയില് തയ്യാറാക്കിയിരിക്കുന്ന ബോംബ് പ്രൂഫ്, കെമിക്കല് പ്രൂഫ് ഇടനാഴിവഴിയാണ് കസബിനെ കോടിമുറിയില് എത്തിച്ചത്.
ഇടനാഴിയല് ക്ലോസ്ഡ് സര്ക്യൂട്ട് കാമറകളും ഘടിപ്പിച്ചിട്ടുണ്ട്. മാധ്യമപ്രവര്ത്തകര്, അഭിഭാഷകന്, കോടതി ജീവനക്കാര് എന്നിവര്ക്ക് പ്രത്യേക ബാര്കോഡഡ് കാര്ഡുകളും ഏര്പ്പെടുത്തിയിട്ടുണ്ട്.
ഇതിനിടെ കസബിനെ കാണാന് അയാളുടെ അമ്മയെ അനുവദിക്കുമെന്ന് മന്ത്രി പ്രണബ് മുഖര്ജി അറിയിച്ചിട്ടുണ്ട്. കസബിനെ കാണണമെന്നാവശ്യപ്പെട്ടുകൊണ്ട് അമ്മ കേന്ദ്രസര്ക്കാറിന് ഹര്ജി നല്കിയിരുന്നു.