പാരീസില്‍ എല്‍ടിടിഇ അനുകൂല പ്രകടനത്തില്‍ സംഘര്‍ഷം

പാരിസ്‌: ശ്രീലങ്കയിലെ സൈനിക നടപടിക്കെതിരെ ഫ്രാന്‍സില്‍ തമിഴ് വംശജര്‍ നടത്തിയ പ്രകടനം അക്രമാസക്തമായി. അക്രമ സംഭവങ്ങളുമായി ബന്ധപ്പെട്ട് 180 പേരെ പോലീസ്‌ അറസ്‌റ്റു ചെയ്‌തു. പാരീസിലെ റെയില്‍വെ സ്റ്റേഷനു മുന്നിലാണ്‌ പ്രകടനം നടന്നത്‌.

പ്രകടനക്കാര്‍ പോലീസിന് നേരെ കുപ്പി എറിഞ്ഞതാണ്‌ സംഘര്‍ഷത്തിന് വഴിതെളിച്ചത്. ലാത്തിച്ചാര്‍ജ്ജില്‍ ഒരു പോലീസുകാരനടക്കം നാലുപേര്‍ക്ക്‌ പരിക്കേറ്റു.

തമിഴ് വംശജര്‍ക്കെതിരെ നടക്കുന്ന സൈനിക നടപടി അവസാനിപ്പിക്കാന്‍ ഫ്രഞ്ച്‌ പ്രസിഡന്റ്‌ നിക്കൊളാസ്‌ സര്‍ക്കോസി ഇടപെടണമെന്ന്‌ ആവശ്യപ്പെട്ടായിരുന്നു പ്രകടനം. നിരവധി വാഹനങ്ങള്‍ പ്രകടനക്കാര്‍ തകര്‍ത്തു. തിങ്കളാഴ്ച ലണ്ടന്‍ നഗരത്തിലും എല്‍ടിടിഇ അനുകൂലികള്‍ പ്രകടനം നടന്നിരുന്നു. പ്രകടനക്കാര്‍ ബ്രിട്ടീഷ് പാര്‍ലമെന്റിന് മുന്പില്‍ റോഡുകള്‍ ഉപരോധിച്ചെങ്കിലും അനിഷ്ട സംഭവങ്ങളൊന്നും ഉണ്ടായില്ല.