ബന്ദികളായ തീവണ്ടി യാത്രക്കാരെ മോചിപ്പിച്ചു

റാഞ്ചി: ഝാര്‍ഖണ്ഡില്‍ നക്സലൈറ്റുകള്‍ ബന്ദികളാക്കിയ തീവണ്ടി യാത്രക്കാരെ മോചിപ്പിച്ചു. മൂന്ന് മണിക്കൂര്‍ നീണ്ട ബന്ദി നാടകത്തിന് ശേഷം ബുധനാഴ്ച രാവിലെ പതിനൊന്നരയോടെ നക്സലൈറ്റുകള്‍ തന്നെയാണ് യാത്രക്കാരെ മോചിപ്പിച്ചത്. തീവണ്ടിയുടെ നിയന്ത്രണം വിട്ടുകൊടുത്ത നക്സലൈറ്റുകള്‍ ലെത്ഹാര്‍ സ്റ്റേഷന്‍ വിട്ടു പോകുകകയും ചെയ്തു. സംഭവത്തില്‍ ആര്‍ക്കും പരിക്കേറ്റട്ടില്ലെന്ന് അധികൃതര്‍ അറിയിച്ചു

ബുധനാഴ്‌ച രാവിലെ 7.30 നാണ്‌ ബര്‍ഖാന-മുഗള്‍സരായ്‌ തീവണ്ടിയിലെ യാത്രക്കാരെ ലത്‌ഹാര്‍ സ്‌റ്റേഷനില്‍ വെച്ചാണ് നക്സലൈറ്റുകള്‍ ബന്ദികളാക്കിയത്‌. തീവണ്ടിയുടെ ഡ്രൈവറെയും ഗാര്‍ഡിനെയുമടക്കം 700ഓളം യാത്രക്കാരെയാണ് നക്സലൈറ്റുകള്‍ ബന്ദികളാക്കിയത്.

ജാര്‍ഖണ്ഡ്‌ അടക്കമുള്ള സംസ്ഥാനങ്ങളില്‍ വ്യാഴാഴ്‌ച രണ്ടാംഘട്ട തിരഞ്ഞെടുപ്പ്‌ നടക്കാനിരിക്കെയാണ്‌ സംഭവം നടന്നത്‌. ചൊവ്വാഴ്‌ച രാത്രി മുതല്‍ സംസ്ഥാനത്ത്‌ വ്യാപകമായ അക്രമമാണ്‌ നക്സലൈറ്റുകള്‍ അഴിച്ചു വിട്ടത്. റെയില്‍വെ സ്‌റ്റേഷനും സ്‌കൂളും ചൊവ്വാഴ്‌ച രാത്രി അവര്‍ ബോംബുവച്ച്‌ തകര്‍ത്തു.

ദില്ലിയിലേക്ക് പോയ രാജധാനി എക്‌സ്‌പ്രസിനുനേരെ ബോംബാക്രമണം നടത്താന്‍ പദ്ധതിയിട്ടിരുന്നതായി പോലീസ്‌ പറഞ്ഞു. തീവണ്ടി കടന്നുപോകുന്നതിന്‌ അര മണിക്കൂര്‍ മുന്‍പാണ്‌ സ്‌ഫോടനങ്ങള്‍ ഉണ്ടായത്. പ്രദേശത്തെ തീവണ്ടി ഗാതഗതം തടസ്സപ്പെട്ടിരിയ്ക്കുകയാണ്.