ഇടതിനെ നോട്ടമിട്ട് പവാറും ലാലുവും
ദില്ലി: ലോക്സഭാ തിരഞ്ഞെടുപ്പിന്റെ രണ്ടാംഘട്ട വോട്ടെടുപ്പ് പുരോഗമിയ്ക്കുന്നതിനിടെ ഇടത് അനുകൂല പ്രസ്താവനകളുമായി യുപിഎ ഘടകകക്ഷികളായ ആര്ജെഡിയും എന്സിപിയും രംഗത്തെത്തി.
ഇടതുപക്ഷമായി സംഖ്യത്തിന് തയാറാണെന്ന് ആര്ജെഡി നേതാവും റെയില്വെ മന്ത്രിയുമായ ലാലു പ്രസാദ് യാദവ് വ്യക്തമാക്കി. കോണ്ഗ്രസ് നേതൃത്വത്തിലുള്ള യുപിഎയ്ക്ക് സര്ക്കാര് ഉണ്ടാക്കാന് കഴിഞ്ഞില്ലെങ്കില് ഇക്കാര്യം പരിഗണിയ്ക്കും. തിരഞ്ഞെടുപ്പിന് ശേഷം സംഖ്യമുണ്ടാക്കുന്നതിനായി ആര്ജെഡി വാതില് തുറന്നിട്ടിരിയ്ക്കുകയാണ്.
സിപിഎമ്മുമായി പാര്ട്ടിയ്ക്ക് ശക്തമായ ബന്ധമുണ്ടെന്നും ആണവ കരാറിന്റെ കാര്യത്തില് മാത്രമാണ് ഇടതുപക്ഷവുമായി അഭിപ്രായ ഭിന്നതയുള്ളതെന്നും ലാലു പറഞ്ഞു.
അതേ സമയം, ഇടത് പാര്ട്ടികള് തൊട്ടുകൂടാത്തവരാണെന്ന് കരുതുന്നില്ലെന്നായിരുന്നു എന്സിപി നേതാവ് പവാര് പ്രസ്താവിച്ചിരിയ്ക്കുന്നത്.
കേന്ദ്രത്തില് അധികാരത്തിലെത്താന് ഇടതുപാര്ട്ടികളുടെ പിന്തുണ അനിവാര്യമാണ്. ബാരാമതിയില് മകള് സുപ്രിയ സുലെക്കൊപ്പം വോട്ട് രേഖപ്പെടുത്തിയശേഷം സംസാരിക്കുകയായിരുന്നു അദ്ദേഹം.