പ്രധാനമന്ത്രിയാകാന് പരിചയമായിട്ടില്ല: രാഹുല്
കൊല്ക്കത്ത: പ്രധാനമന്ത്രിയാകാനുള്ള പരിചയസമ്പന്നത തനിക്കായിട്ടില്ലെന്ന് എഐസിസി ജനറല് സെക്രട്ടറി രാഹുല് ഗാന്ധി.
കൊല്ക്കത്തയില് പ്രണബ് മുഖര്ജിയ്ക്കൊപ്പം മാധ്യമ പ്രവര്ത്തകരോട് സംസാരിക്കുകയായിരുന്നു രാഹുല്. പ്രധാനമന്ത്രിയാകാനുള്ള അവസരം വന്നാല് അത് നിരസിക്കും.
യൂത്ത് കോണ്ഗ്രസിനെ ശക്തിപ്പെടുത്തുകയെന്നതാണ് പാര്ട്ടി ഏല്പ്പച്ചിരിക്കുന്ന ദൗത്യം. അതിനാണ് ഇപ്പോള് പ്രാധാന്യം നല്കുന്നത്- രാഹുല് വ്യക്തമാക്കി.
ഇടതുപാര്ട്ടികള്ക്കെതിരെ രാഹുല് രൂക്ഷമായ വിമര്ശനമാണ് ഉയര്ത്തിയത്. രാജ്യത്തിന്റെ പുരോഗതിയ്ക്കും വളര്ച്ചയ്്ക്കുംവേണ്ടി ഇടതുപാര്ട്ടികള് ഒരു നയവും സ്വീകരിച്ചിട്ടില്ല.
പശ്ചിമ ബംഗാളില് ഇടതുസര്ക്കാറിന് പാവപ്പെട്ടവരുടെ പ്രശ്നങ്ങള് പരിഹരിക്കാന് കഴിഞ്ഞില്ല. അതേസമയം യുപിഎ സര്ക്കാര് പാവപ്പെട്ടവര്ക്കായി ഒട്ടേറെ കാര്യങ്ങള് ചെയ്തിട്ടുണ്ട്- രാഹുല് ചൂണ്ടിക്കാട്ടി.
തിരഞ്ഞെടുപ്പിന് ശേഷം സഖ്യമുണ്ടാക്കുന്നതിന് കോണ്ഗ്രസിന്റെ വാതില് ഇടതുപാര്ട്ടികള്ക്കുമാത്രമല്ല എല്ലാവര്ക്കുമായി തുറന്നിട്ടിരിക്കും. തിരഞ്ഞെടുപ്പിന് ശേഷം ഇടതുപാര്ട്ടികളുമായി സഖ്യമുണ്ടാക്കുന്നതിനെക്കുറിച്ചുള്ള ചോദ്യത്തിന് മറുപടിയായിട്ടാണ് രാഹുല് ഇക്കാര്യം പറഞ്ഞത്.
അയോധ്യയില് ബാബറി മസ്ജിദ് തകര്ത്തതിന് പിന്നില് ബിജെപിയാണെന്നും എല്ടിടിഇ തീവ്രവാദി സംഘടനയാണെന്നും അദ്ദേഹം പറഞ്ഞു.
എന്റെ പിതാവിനെ വധിച്ചത് അവരാണ്. എന്നാല് ശ്രീലങ്കയിലെ സാധാരണ ജനങ്ങളുടെ അവകാശങ്ങള് സംരക്ഷിച്ചുവേണം എന്തു നടപടിയും സ്വീകരിക്കേണ്ടത്. യുദ്ധമേഖലയില് സാധാരണക്കാര് കടുത്ത ദുരിതം അനുഭവിക്കുന്നു. ഇത് അവസാനിപ്പിക്കാന് നടപടിവേണം-രാഹുല് ആവശ്യപ്പെട്ടു.