എകെ 47ന്‌ 85000 രൂപ

ജമ്മു: എകെ 47 സ്വന്തമാക്കാനായി ജമ്മു സ്വദേശിയായ യുവാവ്‌ 85000രൂപ ചെലവാക്കി. അത്ഭുതപ്പെടേണ്ട എകെ 47 തോക്കിന്റെ കാര്യമല്ല പറയുന്നത്‌. എകെ 47 എന്ന രജിസ്‌ട്രേഷന്‍ നമ്പറിന്‌ വേണ്ടിയാണ്‌ ഭാദീന്‍തിയിലെ മുഹമ്മദ്‌ റഫീഖ്‌ മിര്‍ എണ്‍പത്തി അയ്യായിരം രൂപ മുടക്കിയത്‌.

തന്റെ പുതിയ ഹോണ്ട സിറ്റി കാറിന്‌ വേണ്ടിയാണ്‌ റഫീഖ്‌ ഈ കൗതുകമുണര്‍ത്തുന്ന നമ്പര്‍ സ്വന്തമാക്കിയത്‌. തുറന്ന വേദിയിലായിരുന്നു നമ്പറിന്റെ ലേലം നടന്നത്‌.

ജമ്മുവിലെ റീജയണല്‍ ട്രാന്‍സ്‌പോര്‍ട്ട്‌ ഓഫീസില്‍ ഈ നമ്പറിനായി നൂറു കണക്കിന്‌ അപേക്ഷകളായിരുന്നു വന്നത്‌. എന്നാല്‍ ലേലത്തില്‍ മൂന്നുപേര്‍ മാത്രമാണ്‌ പങ്കെടുത്തത്‌. വാഹനം വാങ്ങിയിട്ട്‌ കുറച്ചുനാല്‍ ആയെങ്കിലും റഫീഖ്‌ ഈ നമ്പറിനായി കാത്തിരിക്കുകയായിരുന്നുവത്രേ.

ടോക്കണ്‍ ഫീയും ലേലത്തുകയും മറ്റു നടപടിക്രമങ്ങളും കഴിയുമ്പോഴേയക്കും മൊത്തം ഒരു ലക്ഷത്തിലധികം രൂപ ചെലവാകും ഈ രജിസ്‌ട്രേഷന്‍ നമ്പറിന്‌.

ഇതാദ്യമായിട്ടാണ്‌ ഒരു വാഹന രജിസ്‌ട്രേഷന്‍ നമ്പറിന്‌ സംസ്ഥാനത്ത്‌ ഇത്രയേറെ ലേലത്തുക ലഭിക്കുന്നതെന്ന്‌ ട്രാന്‍സ്‌പോര്‍ട്ട്‌ ഓഫീസ്‌ അധികൃതര്‍ പറഞ്ഞു.

ഇതിന്‌ മുമ്പ്‌ തന്റെ മറ്റൊരു വാഹനത്തിനായി ഇയാള്‍ എകെ 57 നമ്പര്‍ സ്വന്തമാക്കിയത്‌ 29,300 രൂപയ്‌ക്കായിരുന്നു.