വിമാനം താഴ്‌ന്നുപറന്നതില്‍ ഒബാമ മാപ്പു പറഞ്ഞു

വാഷിങ്‌ടണ്‍: തന്റെ വിമാനം താഴ്‌ന്നു പറന്നതിനെത്തുടര്‍ന്ന്‌ ജനങ്ങള്‍ക്ക്‌ പരിഭ്രാന്തിയും ബുദ്ധിമുട്ടുമുണ്ടായതില്‍ അമേരിക്കന്‍ പ്രസിഡന്റ്‌ ബരാക്‌ ഒബാമ മാപ്പു പറഞ്ഞു.

മന്‍ഹാട്ടന്‍ നഗരത്തിലും ലിബര്‍ട്ടി സ്‌റ്റാച്യൂവിനും മുകളിലൂടെ താഴ്‌ന്നു പറന്ന വിമാനങ്ങള്‍ കണ്ട്‌ ജനങ്ങള്‍ ആകെ പരിഭ്രാന്തരായിരുന്നു. ഒബാമയുടെ വിമാനവും ഒരു യുദ്ധവിമാനവുമായിരുന്നു മന്‍ഹാട്ടന്‍ ആകാശത്ത്‌ താഴ്‌ന്നു പറന്നത്‌. ഫോട്ടോ എടുക്കാന്‍ വേണ്ടിയായിരുന്നു മുന്നറിയിപ്പൊന്നുമില്ലാതെ വിമാനങ്ങള്‍ താഴ്‌ന്നുപറന്നത്‌.

വേള്‍ഡ്‌ ട്രേഡ്‌ സെന്റര്‍ ആക്രമണത്തിന്റെ ആഘാതത്തില്‍ നിന്നും വിമുക്തരാകാത്ത ന്യൂയോര്‍ക്ക്‌ അധികൃതര്‍ പരിഭ്രാന്തിയില്‍ കെട്ടിടങ്ങളും ഓഫീസുകളും ഒഴിപ്പിച്ചു. യുഎസ്‌ പ്രസിഡന്റിന്റെ ഔദ്യോഗിക യാത്രാവിമാനമായ കൂറ്റന്‍ ബോയിങ്‌ 747 ജെറ്റിന്റെ ഫോട്ടോഷൂട്ടിന്‌ വൈറ്റ്‌ഹൗസ്‌ അനുമതി നല്‍കിയിരുന്നു.

എന്നാല്‍ ഇക്കാര്യം ജനങ്ങളെ അറിയിച്ചിരുന്നില്ല. വിമാനത്തില്‍ ഒബാമയുണ്ടായിരുന്നില്ല. വിമാനത്തില്‍ തീവ്രവാദികള്‍ തന്നെയാണെന്ന്‌ കരുതി പരിഭ്രാന്തരായ ജനങ്ങള്‍ ഏറെ നേരം തെരുവുകളിലിറങ്ങി നില്‍ക്കുകയായിരുന്നു.

ഫോട്ടോഷൂട്ടിന്‌ വൈറ്റ്‌ഹൗസിന്റെ അനുമതി ഉണ്ടായിരുന്നുവെങ്കിലും ഒബാമ കാര്യം അറിഞ്ഞിരുന്നില്ലെന്നാണ്‌ സൂചന. ഇതില്‍ അദ്ദേഹം രോഷാകുലനാണെന്നും റിപ്പോര്‍ട്ടുകള്‍ സൂചിപ്പിക്കുന്നു. സംഭവത്തില്‍ വൈറ്റ്‌ഹൗസ്‌ മിലിട്ടറി ഓഫീസില്‌ ഡയറക്ടര്‍ ലൂയി കാള്‍ഡറയും മാപ്പു പറഞ്ഞിട്ടുണ്ട്‌.