തീവ്രവാദം: ഏറെ കെടുതികള്‍ ഇന്ത്യയില്‍

വാഷിങ്‌ടണ്‍: തീവ്രവാദത്തിന്റെ കെടുതികള്‍ ഏറ്റവും കൂടുതല്‍ അനുഭവിക്കുന്ന രാജ്യം ഇന്ത്യയാണെന്ന്‌ അമേരിക്കയില്‍ നിന്നുമുള്ള റിപ്പോര്‍ട്ട്‌.

ഇത്രയേറെ ഭീകരാക്രമണങ്ങള്‍ ഉണ്ടായെങ്കിലും 2008ല്‍ നടന്ന ആക്രമണങ്ങളില്‍ ഒരൊറ്റ കേസില്‍പ്പോലും വിചാരണ നടപടികള്‍ നടന്നിട്ടില്ലെന്നും കഴിഞ്ഞവര്‍ഷം ആഗോളതലത്തില്‍ നടന്ന ഭീകരാക്രമണങ്ങളെക്കുറിച്ചുള്ള പഠന റിപ്പോര്‍ട്ടില്‍ പറയുന്നു.

മുംബൈ ആക്രമണത്തിന്‌ പുറമേ കാബൂളില്‍ ഇന്ത്യന്‍ എംബസിക്കുനേരെയുണ്ടായ ആക്രമണം, ജയ്‌പൂര്‍ ബോംബ്‌ സ്‌ഫോടനം, അഹമ്മദാബാദ്‌, ദില്ലി, അസം എന്നിവിടങ്ങളിലുണ്ടായ സ്‌ഫോടനം എന്നിവയും ഇന്ത്യയില്‍ 2008ല്‍ നടന്ന പ്രധാന ഭീകരാക്രമണങ്ങളാണെന്ന്‌ റിപ്പോര്‍ട്ടില്‍ ചൂണ്ടിക്കാണിക്കുന്നു.

തീവ്രവാദികള്‍ക്ക്‌ പ്രവര്‍ത്തനത്തിനായി വന്‍തോതില്‍ പണവും മറ്റു സഹായങ്ങളും ലഭിക്കുന്നുണ്ടെന്ന്‌ ആസൂത്രണത്തിലെ ഏകോപനത്തില്‍ നിന്നും മനസ്സിലാകുംമെന്ന്‌ പറയുന്ന റിപ്പോര്‍ട്ടില്‍ ആണവായുധങ്ങള്‍ തീവ്രവാദികളുടെ കൈകളില്‍ എത്താതിരിക്കാന്‍ കേന്ദ്രസര്‍ക്കാര്‍ സ്വീകരിച്ച നടപടികളെ പ്രശംസിക്കുന്നുമുണ്ട്‌.

ഹവാല, ക്രഡിറ്റ്‌ കാര്‍ഡ്‌ തുടങ്ങിയവ വഴിയും ധാരാളം സമ്പത്തുള്ള തീവ്രവാദ അനുഭാവികളില്‍ നിന്നുമാണ്‌ ഇവര്‍ക്ക്‌ പ്രവര്‍ത്തിക്കാനുള്ള പണം കിട്ടുന്നതെന്നാണ്‌ പഠനത്തില്‍ കണ്ടെത്തിയിരിക്കുന്നത്‌.

കേസുകളില്‍ വിചാരണകളും നടപടികളുമൊന്നും മുറയ്‌ക്കു നടക്കുന്നില്ലെങ്കിലും സുരക്ഷാ ക്രമീകരണങ്ങള്‍ വര്‍ധിപ്പിക്കാനും ചില ആക്രമണങ്ങള്‍ നേരത്തേ കണ്ടെത്തി തടയാനും ഇന്ത്യയ്‌ക്ക്‌ കഴിഞ്ഞുവെന്നും റിപ്പോര്‍ട്ടിലുണ്ട്‌.