3പേര്‍ ആശുപത്രിയില്‍; പന്നിപ്പനിയെന്ന്‌ സംശയം

ദില്ലി: പന്നിപ്പനി(എച്ച്‌1എന്‍1 ഇന്‍ഫ്‌ളുവന്‍സ) ബാധയുണ്ടെന്ന്‌ സംശയിക്കുന്ന മൂന്നുപേരെ ദില്ലിയിലെ റാം മനോഹര്‍ ആശുപത്രിയില്‍ പ്രവേശിപ്പിച്ചു. രണ്ടുപേര്‍ ചിക്കാഗോയില്‍ നിന്നും ഒരാള്‍ ലണ്ടനിയില്‍ നിന്നുമാണ്‌ ദില്ലിയില്‍ എത്തിയത്‌.

മൂന്നുപേര്‍ക്കും പന്നിപ്പനിയുടെ ലക്ഷണങ്ങളായ ചുമ, ജലദോശം, ശ്വാസതടസ്സം എന്നിവ ഉണ്ടെന്നാണ്‌ അറിയുന്നത്‌. ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ ഡോക്ടര്‍മാരാണ്‌ മൂവരെയും ആശുപത്രിയിലേയ്‌ക്ക്‌ മാറ്റാന്‍ നിര്‍ദ്ദേശിച്ചത്‌.

വെള്ളിയാഴ്‌ച രാത്രിയിലാണ്‌ അമേരിക്കന്‍ എയര്‍ലൈന്‍സിന്റെ വിമാനത്തിലെത്തിയ പ്രേംജിത്‌ ഗൗര്‍, ജഗ്‌ വീര്‍ സിങ്‌ എന്നിവര്‍ക്ക്‌ പനിബാധയുടെ ലക്ഷണങ്ങള്‍ അനുഭവപ്പെട്ടത്‌. ശനിയാഴ്‌ച രാവിലെ ബ്രിട്ടീഷ്‌ എയര്‍ലൈന്‍സിന്റെ വിമാനത്തില്‍ ലണ്ടനില്‍നിന്നെത്തിയ അശ്വനിയ്‌ക്കും അസ്വസ്ഥതയുണ്ടായതിനെത്തുടര്‍ന്ന്‌ ആശുപത്രിയില്‍ പ്രവേശിപ്പിക്കുകയായിരുന്നു.

മൂവരും നിരീക്ഷണത്തിലാണെന്ന്‌ റാം മനോഹര്‍ ലോഹ്യ ആശുപത്രി അധികൃതര്‍ പറഞ്ഞു. എന്നാല്‍ മൂവരിലും പന്നിപ്പനി ബാധിയുണ്ടെന്ന്‌ സ്ഥിരീകരിച്ചിട്ടില്ലെന്ന്‌ കേന്ദ്ര ആരോഗ്യമന്ത്രാലയം അറിയിച്ചു.

നേരത്തേ ഹൈദരാബാദില്‍ ഒരാള്‍ക്ക്‌ പന്നിപ്പനിയുടെ ലക്ഷണങ്ങളുണ്ടെന്ന്‌ റിപ്പോര്‍ട്ട്‌ ഉണ്ടായിരുന്നെങ്കിലും പിന്നീട്‌ അത്‌ പന്നിപ്പനിയല്ലെന്ന്‌ സ്ഥിരീകരിച്ചിരുന്നു.