ദില്ലി വീണ്ടും ഭീതിയില്‍ രണ്ടുപേര്‍ ആശുപത്രിയില്‍

ദില്ലി: ദില്ലിയില്‍ വീണ്ടും പന്നിപ്പനി ഭീതി. ഫ്രാങ്ക്‌ഫര്‍ട്ടില്‍ പര്‍വ്വതാരോഹണത്തിന്‌ പോയി തിരിച്ചെത്തിയ ഒരു 28കാരിയിലും അമേരിക്കയിലെ ഡെട്രോയിട്ടില്‍ നിന്നും എത്തിയ ഒരു ഇരുപത്തിനാല്‌ കാരനിലുമാണ്‌ രോഗബാധയുടെ ലക്ഷണങ്ങള്‍ കണ്ടത്‌.

ഇന്ത്യന്‍ എയര്‍ലൈന്‍സ്‌ വിമാനത്തിലെത്തിയ യുവതിയെയും കെഎല്‍എം ഫ്‌ളൈറ്റില്‍ എത്തിയ യുവാവിനെയും എയര്‍പോര്‍ട്ട്‌ ഓര്‍ഗനൈസേഷന്റെ ചികിത്സാകേന്ദ്രത്തില്‍ പ്രവേശിപ്പിച്ചു. ഇവര്‍ നിരീക്ഷണത്തിലാണ്‌.

ഞായറാഴ്‌ച രാത്രിയോടെയാണ്‌ ഇവര്‍ ദില്ലിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തില്‍ എത്തിയത്‌. തുടര്‍ന്ന്‌ വിമാനത്താവളത്തില്‍ നടന്ന പരിശോധനയിലാണ്‌ പനിയുടെ ലക്ഷണങ്ങള്‍ ഉണ്ടെന്ന്‌ കണ്ടത്‌.

ഇരുവരുടെയും രക്തസാമ്പിളുകളും മറ്റും ദില്ലിയിലെ നാഷണല്‍ ഇന്‍സ്‌റ്റിറ്റിയൂട്ട്‌ ഓഫ്‌ കമ്മ്യൂണിക്കബിള്‍ ഡിസീസിലേയ്‌ക്കും പുനെയിലെ നാഷണല്‍ ഇന്‍സ്റ്റിറ്റിയൂട്ട്‌ ഓഫ്‌ വൈറോളജിയിലേയ്‌ക്കും പരിശോധനയ്‌ക്കായി അയച്ചിരിക്കുകയാണ്‌.

തിങ്കളാഴ്‌ച വൈകുന്നേരത്തോടെ ഇതിന്റെ പരിശോധനാഫലങ്ങള്‍ ലഭിക്കുമെന്നാണ്‌ അറിയുന്നത്‌. നേരത്തേ പന്നിപ്പനി ബാധയുണ്ടെന്ന്‌ സംശയിച്ച്‌ ലണ്ടനില്‍ നിന്നും യുഎസില്‍ നിന്നും വന്ന രണ്ടുപേരെ രാം മനോഹര്‍ ലോഹ്യ ആശുപത്രിയില്‍ പ്രവേശിപ്പിച്ചിരുന്നു.

എന്നാല്‍ ഇവര്‍ക്ക്‌ പന്നിപ്പനിബാധയ്‌ക്ക്‌ കാരണമായ എച്ച്‌1എന്‍1 വൈറസ്‌ ബാധയില്ലെന്ന്‌ കണ്ട്‌ വിട്ടയച്ചിരുന്നു. കൂടുതല്‍ രാജ്യങ്ങളിലേയ്‌ക്ക്‌ വൈറസ്‌ പരക്കുകയും പന്നിപ്പനിയെ ലോകവിപത്തായി പ്രഖ്യാപിക്കുന്ന കാര്യം യുഎന്‍ പരിഗണിക്കുകയും ചെയ്യുന്ന സാഹചര്യത്തില്‍ വിദേശങ്ങളില്‍ നിന്നും ഇന്ത്യയിലെത്തുന്നവരെ കര്‍ശന പരിശോധനകള്‍ക്ക്‌ വിധേയരാക്കുന്നുണ്ട്‌.

രാജ്യത്തെ പ്രധാനപ്പെട്ട 21 വിമാനത്താവളങ്ങളില്‍(കേരളത്തില്‍ കൊച്ചി, കോഴിക്കോട്‌, തിരുവനന്തപുരം)വിദഗ്‌ധ ഡോക്ടര്‍മാരുടെ നേതൃത്വത്തിലുള്ള സംഘങ്ങള്‍ യാത്രക്കാരെ പരിശോധിക്കുന്നുണ്ട്‌. ആര്‍ക്കെങ്കിലും രോഗബാധയുടെ ലക്ഷണം കണ്ടാല്‍ പ്രവേശിപ്പിക്കാനായി ആശുപത്രികളിലും സൗകര്യങ്ങള്‍ ഒരുക്കിയിട്ടുണ്ട്‌. ഇതുവരെ ഇന്ത്യയില്‍ എച്ച1എന്‍1 വൈറസ്‌ ബാധ സ്ഥിരീകരിച്ചിട്ടില്ല.