ടി.വിയ്‌ക്കൊപ്പം ജീവിക്കാനനുവദിച്ചില്ല: ഗൗരിയമ്മ

അമ്പലപ്പുഴ: പാര്‍ട്ടിയുടെ നിര്‍ദ്ദേശ പ്രകാരം വിവാഹിതരായ തന്നെയും ടി.വി തോമസിനെയും ഒരുമിച്ച്‌ ജീവിക്കാന്‍ കമ്യൂണിസ്റ്റ്‌ പാര്‍ട്ടി അനുവദിച്ചില്ലെന്ന്‌ മുന്‍ മന്ത്രിയും ജെഎസ്‌എസ്‌ നേതാവുമായ കെ ആര്‍ ഗൗരിയമ്മ.

തോമസിനൊപ്പം ജീവിക്കാന്‍ മന്ത്രിസ്ഥാനം പോലും രാജിവയ്‌ക്കാന്‍ ഞാന്‍ തയ്യറായിരുന്നു. അതിനുപോലും സിപിഎം സമ്മതിച്ചില്ല. പാര്‍ട്ടി നിര്‍ദ്ദേശപ്രകാരമാണ്‌ ഞങ്ങള്‍ വിവാഹിതരായത്‌.

അതേ പാര്‍ട്ടിതന്നെ ഞങ്ങളെ വേര്‍പിരിക്കുകയും ചെയ്‌തു. കുടുംബജീവിതം നയിക്കാന്‍ പോലും പാര്‍ട്ടി സമ്മതിച്ചില്ല- കേരള മിശ്രവിവാഹവേദി സംസ്ഥാന കണ്‍വെന്‍ഷന്‍ വേദിയില്‍ ഗൗരിയമ്മ വികാരാധീനയായി.

മിശ്രിവിവാഹിതര്‍ക്കു സര്‍ക്കാര്‍ ആനുകൂല്യം നല്‍കണം. സ്‌ത്രീധനം സ്‌ത്രീകളെ കമ്പോളത്തിലെ വില്‍പനച്ചരക്കുപോലെയാക്കി. ഇതിന്‌ മാറ്റമുണ്ടാകണമെന്നും ഗൗരിയമ്മ ആവശ്യപ്പെട്ടു.

മിശ്രിവിവാഹത്തിന്‌ താല്‍പര്യമുള്ള യുവതീയുവാക്കാളുടെ കൂടിച്ചേരലായ വൈവാഹിക സംഗമവും കണ്‍വെന്‍ഷനോടൊപ്പം നടന്നു. വിവിധ ജില്ലകളില്‍ നിന്നും ഒട്ടേറെപ്പേര്‍ സംഗമത്തിന്‌ എത്തിയിരുന്നു.