പിതാവ്‌ പീഡിപ്പിച്ചുവെന്ന്‌ ടെന്നിസ്‌ താരം

സിഡ്‌നി: പിതാവിന്റെ ശാരീരിക പീഡനം സഹിക്കാന്‍ വയ്യാതെ താന്‍ വീടുവിട്ടിറങ്ങുകയായിരുന്നുവെന്ന്‌ ആസ്‌ത്രേലിയയിലെ ടെന്നിസ്‌ താരം

ജെലേന ഡോകിച്ച്‌(26).

ആസ്‌ത്രേലിയയിലെ പ്രശസ്‌ത സ്‌പോര്‍ട്‌സ്‌ മാഗസിനായ സ്പോര്ട്സ് ആന്‍റ് സ്റ്റൈലിന് നല്‍കിയ അഭിമുഖത്തിലാണ്‌ ജെലേന ഇക്കാര്യം വെളിപ്പെടുത്തിയത്‌. പിതാവ്‌ ഡാമിറിന്റെ പീഡനം സഹിക്കാന്‍ കഴിയാതെ 2002ലാണ്‌ ജെലേന വീടുവിട്ടിറങ്ങിയത്‌.

പിതാവിന്റെ ക്രൂരത കാരണം തനിക്ക്‌ കരിയറില്‍ വേണ്ടത്ര ശ്രദ്ധിക്കാന്‍ കഴിഞ്ഞില്ലെന്നും അക്കാലത്ത്‌ താന്‍ മാനസികമായി വളരെ തകര്‍ന്ന നിലയിലായിരുന്നുവെന്നും ജെലേന വ്യക്തമാക്കി.

ജെലേനയുടെ ആരോപണങ്ങള്‍ ശരിയാണോ എന്നറിയാനായി മാഗസിന്‍ അധികൃതര്‍ ഡാമിറിനെ ഫോണ്‍ ചെയ്‌തെങ്കിലും അദ്ദേഹം സംസാരിക്കാന്‍ തയ്യാറായില്ലെന്ന്‌ മാഗസിന്‍ റിപ്പോര്‍ട്ട്‌ ചെയ്‌തിട്ടുണ്ട്‌.

ലോക ടെന്നീസ്‌ റാങ്കിങില്‍ മുപ്പത്തിയൊന്നാം സ്ഥാനത്താണ്‌ ഇപ്പോള്‍ ജെലേന. യൂഗോസ്ലോവാക്യയില്‍ ജനിച്ച ജെലേന ഡോകിച്ച്‌ 2000ലാണ്‌ ആസ്‌ത്രേലിയന്‍ ഓപ്പണില്‍ ടെന്നീസില്‍ പങ്കെടുക്കാന്‍ സിഡ്‌നിയിലെത്തിയത്‌.

ആദ്യം സിഡ്‌നിയില്‍ത്തന്നെ താമസമാക്കിയെങ്കിലും പിന്നീട്‌ സെര്‍ബിയയിലേയ്‌ക്ക്‌ മാറി. 2006ല്‍ വീണ്ടും സിഡ്‌നിയിലെത്തി താമസം തുടങ്ങി.