9.46 കോടി ജനങ്ങള് വ്യാഴാഴ്ച ബൂത്തിലേക്ക്
ദില്ലി: ലോക്സഭാ തിരഞ്ഞെടുപ്പിന്റെ നാലാംഘട്ട വോട്ടെടുപ്പില് ഏഴു സംസ്ഥാനങ്ങളിലായി വ്യാഴാഴ്ച 9.46 കോടി വോട്ടര്മാര് ബൂത്തുകളിലേക്ക്. 85 മണ്ഡലങ്ങളിലായി 1315 സ്ഥാനാര്ത്ഥികളാണ് നാലാംഘട്ടത്തില് ജനവിധി തേടുന്നത്. ഇവരില് 119 പേര് സ്ത്രീകളാണ്.
1.29 ലക്ഷം പോളിങ് ബൂത്തുകളാണ് നാലാംഘട്ട വോട്ടെടുപ്പിന് വേണ്ടി സജ്ജീകരിച്ചിരിയ്ക്കുന്നത്. ഇന്ദ്രപ്രസ്ഥത്തില് അധികാരത്തിലേറാന് ആഗ്രഹിയ്ക്കുന്ന കോണ്ഗ്രസിനും ബിജെപിയ്ക്കും ഏറെ നിര്ണായകമാണ് ഈ ഘട്ടം.
വ്യാഴാഴ്ച തിരഞ്ഞെടുപ്പ് നടക്കുന്ന രാജസ്ഥാനിലെ 25 സീറ്റുകളിലും ദില്ലിയെ ഏഴു സീറ്റുകളിലും ഇരു പാര്ട്ടികള്ക്കും തികഞ്ഞ വിജയപ്രതീക്ഷയാണുള്ളത്. ഇതിനൊപ്പം ഉത്തര്പ്രദേശിലെ 18 സീറ്റിലും ഹരിയാനയിലെ 10 സീറ്റിലും വ്യാഴാഴ്ച വിധി നിര്ണയിക്കപ്പെടും. കേന്ദ്ര മന്ത്രി ലാലു പ്രസാദ് യാദവ് മത്സരിയ്ക്കുന്ന പാടലീപുത്രയടക്കം മൂന്നു സീറ്റിലെ വോട്ടെടുപ്പോടെ ബീഹാറിലെ തിരഞ്ഞെടുപ്പ് പൂര്ത്തിയാകും.
നന്ദിഗ്രാം ഉള്പ്പെടുന്ന തംലക്ക് അടക്കം പശ്ചിമ ബംഗാളിലെ 17 സീറ്റിലും നാലാംഘട്ടത്തില് വോട്ടെടുപ്പ് നടക്കും. ഇടതുപക്ഷത്തെ മുട്ടുകുത്തിയ്ക്കുകയെന്ന ഉദ്ദേശത്തോടെ കോണ്ഗ്രസും തൃണമൂലും ഇവിടെ സഖ്യത്തിലേര്പ്പെട്ടിട്ടുണ്ട്. വിദേശകാര്യ മന്ത്രി പ്രണബ് മുഖര്ജി, മുലായം സിങ് യാദവ് എന്നിവര് നാലാംഘട്ടത്തില് ജനവിധി തേടുന്ന പ്രമുഖരില് ഉള്പ്പെടുന്നു.