വ്യഭിചാരം: യുവാവിനെ കല്ലെറിഞ്ഞുകൊന്നു

ടെഹ്‌റാന്‍: ഇറാനില്‍ വ്യഭിചാരക്കുറ്റത്തിന്റെ പേരില്‍ ഒരു യുവാവിനെ കല്ലെറിഞ്ഞു കൊന്നു. സ്വന്തം പ്രവൃത്തിയില്‍ പശ്ചാത്തപിക്കുന്നതായി വ്യക്തമാക്കിയതിനെത്തുടര്‍ന്ന്‌ ഒപ്പമുണ്ടായിരുന്ന സ്‌ത്രീയെ ശിക്ഷയില്‍ നിന്നും ഒഴിവാക്കി.

ഇറാനിലെ വടക്കന്‍ നഗരമായ റാഷ്‌ത്തില്‍ മാര്‍ച്ച്‌ അവസാനമാണത്രേ ഈ സംഭവം നടന്നത്‌. കോടതി വക്താവായ അല്‍റീസ ജംഷീദിയാണ്‌ ചൊവ്വാഴ്‌ച നടത്തിയ വാര്‍ത്താസമ്മേളനത്തില്‍ ഇക്കാര്യം പരസ്യമാക്കിയത്‌.

മനുഷ്യാവകാശ സംഘടനകള്‍, യൂറോപ്യന്‍ യൂണിയന്‍, തുടങ്ങിയവയെല്ലാം ഇറാന്റെ ശിക്ഷാ രീതിയെ നിശിതമായി വിമര്‍ശിച്ചുകൊണ്ട്‌ രംഗത്തെത്തിയിട്ടുണ്ട്‌. മുപ്പതുകാരനായ യുവാവ്‌ തെറ്റ്‌ ചെയ്‌തുവെന്ന്‌ തെളിഞ്ഞതിനെത്തുടര്‍ന്നാണ്‌ ശിക്ഷ വിധിച്ചതെന്നാണ്‌ കോടതി വക്താവ്‌ നല്‍കിയ വിശദീകരണം.

ഇറാന്‍, സൗദി അറേബ്യ തുടങ്ങിയ സ്ഥലങ്ങളില്‍ പല കുറ്റങ്ങള്‍ക്കും തീര്‍ത്തും ക്രൂരവും മനുഷ്യാവകാശങ്ങളെ ലംഘിക്കുന്ന തരത്തിലുമുള്ള ശിക്ഷാ രീതികളാണ്‌ നിലിവിലുള്ളത്‌. പലപ്പോഴും ഇത്തരം ശിക്ഷകള്‍ പൊതുജനമധ്യത്തിലാണ്‌ നടപ്പാക്കുന്നത്‌.

വ്യഭിചാരക്കുറ്റത്തിന്‌ സ്‌ത്രീ, പുരുഷ ഭേദമെന്യേ കല്ലെറിഞ്ഞുകൊല്ലലാണ്‌ ഇവിടെ നടപ്പാക്കുന്ന ശിക്ഷ. പകുതി മണ്ണില്‍ കുഴിച്ചിട്ടശേഷമാണ്‌ കുറ്റവാളികളെ ഇങ്ങനെ കല്ലെറിഞ്ഞ്‌ കൊല്ലുന്നത്‌.

പുരുഷന്മാരാണ്‌ തെറ്റുകാരെങ്കില്‍ അവരെ അരക്കെട്ടുവരെ മണ്ണിനടിയിലാക്കി കുഴിച്ചിട്ട്‌ കല്ലെറിയുന്നു.

സ്‌ത്രീകളാണെങ്കില്‍ അവരെ കഴുത്തുവരെ മണ്ണിനടിയില്‍ മൂടിയാണ്‌ കല്ലെറിയുന്നത്‌. കഴിഞ്ഞ അഞ്ചുവര്‍ഷത്തിനിടയില്‍ ഇറാനില്‍ ഇത്തരത്തില്‍ അഞ്ച്‌‌ പുരുഷന്മാരെ കല്ലെറിഞ്ഞ്‌ കൊന്നിട്ടുണ്ട്‌.