മുംബൈ മോഡല്‍ ആക്രമണം ആവര്‍ത്തിച്ചേയ്‌ക്കും

വാഷിങ്‌ടണ്‍: 2008ല്‌ നടന്ന മുംബൈ തീവ്രവാദി ആക്രമണത്തിന്റെ മാതൃകയില്‍ രാജ്യത്ത്‌ ഇനിയും ആക്രമണങ്ങള്‍ ഉണ്ടാകാന്‍ സാധ്യതയുണ്ടെന്ന്‌ റിപ്പോര്‍ട്ട്‌. സിഐഎ ദക്ഷിണേഷ്യാ വിഭാഗത്തില്‍ നിന്നും വിരമിച്ച ബ്രൂസ്‌ ഒ റീഡല്‍ ആണ്‌ ഈ മുന്നറിയിപ്പ്‌ നല്‍കിയിരിക്കുന്നത്‌.

പാക്കിസ്‌താനിലെ ജിഹാദുകള്‍ ഇപ്പോഴും ഇന്ത്യയെ ലക്ഷ്യമിടുന്നുണ്ട്‌. മുംബൈ ആക്രമണത്തിന്‌ ശേഷം ഇന്ത്യയും പാക്കിസ്‌താനും തമ്മിലുണ്ടായ അകല്‍ച്ചയും സംഘര്‍ഷവും ഇപ്പോഴും മാറിയിട്ടില്ല- അദ്ദേഹം ചൂണ്ടിക്കാട്ടുന്നു.

ഇനിയും ഇത്തരം പ്രശ്‌നങ്ങള്‍ ഉണ്ടായാല്‍ പാക്‌ സൈന്യത്തിന്റെ 80 ശതമാനവും ഇന്ത്യന്‍ അതിര്‍ത്തിയിലേയ്‌ക്ക്‌ നിയോഗിക്കപ്പെടും. മാത്രമല്ല ആ സാഹചര്യത്തില്‍ ആഭ്യന്തര ജിഹാദികളെ നിരീക്ഷിക്കാന്‍ സൈന്യത്തിന്‌ കഴിയാതെവരും. ഇത്തരത്തില്‍ സൈന്യത്തിന്റെ ശ്രദ്ധ മാറ്റുന്നതിനാണ്‌ തീവ്രവാദികള്‍ ഇന്ത്യയെ ആക്രമിക്കുന്നത്‌ എന്നാണ്‌ ബ്രൂസ്‌ പറയുന്നത്‌.

വിദേശ ബന്ധം സംബന്ധിച്ചുള്ള ഒരു കൗണ്‍സിലിന്‌ നല്‍കിയ അഭിമുഖത്തിലാണ്‌ അദ്ദേഹം ഇക്കാര്യങ്ങള്‍ പറഞ്ഞത്‌. പാക്കിസ്ഥാന്റെ ഭീഷണി ആഭ്യന്തര തീവ്രവാദം തന്നെയാണെന്ന കാര്യം അവര്‍ മനസ്സിലാക്കിയിട്ടുണ്ടോയെന്ന്‌ വ്യക്തമല്ല.

അവിടത്തെ സൈന്യം ഇപ്പോഴും ഇന്ത്യയെ ശത്രുവായി കാണുകയും ഇന്ത്യയില്‍ നിന്നുള്ള ഭീഷണി നേരിടാനുമാണ്‌ കൂടുതല്‍ ശ്രദ്ധിക്കുന്നത്‌. എന്നാല്‍ ഇത്‌ രാജ്യത്തിനകത്തുള്ള തീവ്രവാദ സംഘടനകള്‍ക്ക്‌ വളരാന്‍ സാഹചര്യം നല്‍കുന്നുണ്ടെന്ന കാര്യം പാക്‌ അധികൃതര്‍ ആലോചിക്കുന്നില്ല- അദ്ദേഹം ചൂണ്ടിക്കാട്ടി.