ലാവലിന്: ഗവര്ണര്ക്ക് രേഖകള് കൈമാറി
തിരുവനന്തപുരം: ലാവലിന് അഴിമതിക്കേസില് ഗവര്ണര് ആവശ്യപ്പെട്ട കൂടുതല് രേഖകള് മുഖ്യമന്ത്രി വിഎസ് അച്യുതാനന്ദന് അദ്ദേഹത്തിന് കൈമാറി.
അഡ്വക്കേറ്റ് ജനറലിന്റെ ഉപദേശപ്രകാരം പിണറായി വിജയനെ പ്രോസിക്യൂട്ട് ചെയ്യേണ്ടെന്ന മന്ത്രിസഭയുടെ ശുപാര്ശയിന്മേല് തീരുമാനമെടുക്കുന്നതിനായിട്ടാണ് ഗവര്ണര് കേസ് സംബന്ധിച്ച കൂടുതല് രേഖകള് ആവശ്യപ്പെട്ട്.
അഡ്വക്കേറ്റ് ജനറലിന്റെ റിപ്പോര്ട്ട്, ഇതുസംബന്ധിച്ച് തീരുമാനമെടുത്ത മന്ത്രിസഭായോഗത്തിന്റെ കുറിപ്പുകള് എന്നിവയാണ് ഗവര്ണര് ആവശ്യപ്പെട്ടതനുസരിച്ച് വെള്ളിയാഴ്ച മുഖ്യമന്ത്രി കൈമാറിയത്. ഇതുസംബന്ധിച്ച രേഖകളൊന്നും ഗവര്ണര്ക്ക് നല്കിയ കത്തില് ഉള്പ്പെടുത്തിയിരുന്നില്ല.
അതേസമയം എജിയുടെ നിയമോപദേശത്തിന്റെ പകര്പ്പ് മന്ത്രിമാര്ക്കെല്ലാം നല്കിയിരുന്നു. ഇതിന്റെ അടിസ്ഥാനത്തില് നടത്തിയ ചര്ച്ചയിലാണ് പിണറായിയെ പ്രോസിക്യൂട്ട് ചെയ്യാന് അനുമതി നല്കേണ്ടെന്ന് മന്ത്രിസഭ തീരുമാനിച്ചത്. ഈ സാഹചര്യത്തിലാണ് എജിയുടെ നിയമോപദേശത്തിന്റെ പകര്പ്പ് ഗവര്ണര് ആവശ്യപ്പെട്ടത്.
ഇതിനിടെ പിണറായിയുടെ കാര്യത്തില് തീരുമാനമെടുക്കുന്നതിന് മുമ്പ് ഗവര്ണര് ആര്. എസ് ഗവായ് പ്രത്യേക നിയമോപദേശം സ്വീകരിക്കുമെന്ന് അറിയുന്നു. ഇതിനായി അറ്റോര്ണി ജനറല്, സോളിസിറ്റര് ജനറല് എന്നിവരുള്പ്പെടെയുള്ളവരുമായി ഗവര്ണര് ആശയവിനിമയം നടത്തിയേയ്ക്കും. മെയ് 16ന് ശേഷമേ ഗവര്ണര് ഇക്കാര്യത്തില് തീരുമാനമെടുക്കുകയുള്ളു.