മോന്‍സ് ജോസഫ് രാജി വച്ചേക്കും

തിരുവനന്തപുരം: വിമാനയാത്രാക്കേസില്‍ മുന്‍മന്ത്രി പിജെ ജോസഫിനെ കോടതി കുറ്റവിമുക്തനാക്കിയതിനെ തുടര്‍ന്ന് പൊതുമരാമത്ത് മന്ത്രി മോന്‍സ് ജോസഫ് രാജിസന്നദ്ധത അറിയിച്ചു. തിങ്കളാഴ്ച തന്നെ ഇക്കാര്യം ഔദ്യോഗികമായി പ്രഖ്യാപിക്കുമെന്നാണ് റിപ്പോര്‍ട്ടുകള്‍.

വിമാനയാത്രക്കേസില്‍ പ്രതി ചേര്‍ക്കപ്പെട്ടതിനെ തുടര്‍ന്നാണ് പിജെ ജോസഫിന് മന്ത്രി സ്ഥാനം രാജി വയ്ക്കേണ്ടി വന്നത്. എല്‍ഡിഎഫ് മന്ത്രിസഭ നൂറ് ദിവസം തികയ്ക്കന്നതിന് മുന്പായിരുന്നു ജോസഫിന്റെ രാജി. തുടര്‍ന്ന് ടിയു കുരുവിള കേരള കോണ്‍ഗ്രസ് ജോസഫ് വിഭാഗത്തിന്റെ മന്ത്രിയായി. എന്നാല്‍, രാജകുമാരി ഭൂമി ഇടപാട് കേസില്‍ ഉള്‍പ്പെട്ടതിനെ തുടര്‍ന്ന് കുരുവിളയ്ക്കും മന്ത്രിസ്ഥാനം പോയി. പിന്നീടാണ് കേരള കോണ്‍ഗ്രസ് ജോസഫ് ഗ്രൂപ്പില്‍ വിഭാഗീയതയുടെ വിത്തുകള്‍ പാകിക്കൊണ്ട് മോന്‍സ് ജോസഫ് മന്ത്രിസ്ഥാനത്തേക്ക് എത്തിയത്.

പിജെ ജോസഫിനെ കുറ്റവിമുക്തനാക്കിയതില്‍ അതിയായ സന്തോഷമുണ്ടെന്നും, ജോസഫിനെ വീണ്ടും മന്ത്രിയാക്കുന്നതടക്കമുളള കാര്യങ്ങള്‍ പിന്നീട്‌ തീരുമാനിക്കുമെന്നും എല്‍ ഡി എഫ്‌ കണ്‍വീനര്‍ വൈക്കം വിശ്വന്‍ പറഞ്ഞു.

കോടതി വിധിയെ കേരളാ കോണ്‍ഗ്രസ്‌ നേതാവ്‌ പിസി തോമസും സ്വാഗതം ചെയ്തു. ജോസഫിന്‌ മന്ത്രിയാകാനുളള വേദി ഇടതുമുന്നണി ഒരുക്കുമെന്ന്‌ പ്രതീക്ഷിക്കുന്നതായും അദ്ദേഹം പറഞ്ഞു.