വരുണിനെതിരെ മായാ സര്ക്കാര് സുപ്രീം കോടതിയില്
ദില്ലി: ബിജെപിയുടെ പിലിബിത്ത് സ്ഥാനാര്ത്ഥി വരുണ് ഗാന്ധിക്കെതിരെ ചുമത്തിയിരുന്ന ദേശ സുരക്ഷാ നിയമം അലഹബാദ് ഹൈക്കോടതി നിയമിച്ച ഉപദേശക സമിതി അസാധുവാക്കിയതിനെതിരെ മായാവതി സര്ക്കാര് സുപ്രീം കോടതിയെ സമീപിച്ചു.
വരുണിനെതിരെയുള്ള പല പ്രധാന തെളിവുകളും പരിഗണിക്കാന് ഉപദേശക സമിതി തയ്യാറായില്ലെന്ന് ചൂണ്ടിക്കാണിച്ചാണ് ഉത്തര്പ്രദേശ് സര്ക്കാര് മേല് കോടതിയെ സമീപിച്ചിരിയ്ക്കുന്നത്. സമിതിയുടെ തീരുമാനം തിടുക്കത്തിലുള്ളതായിരുന്നുവെന്ന് സംസ്ഥാന സര്ക്കാര് കോടതിയെ ബോധിപ്പിച്ചു.
പിലിഭിത്തിലെ തിരഞ്ഞെടുപ്പ് പ്രചാരണ യോഗങ്ങളില് പ്രസംഗിക്കവെ വര്ഗീയ ചുവയുള്ള പരാമര്ശങ്ങള് നടത്തിയെന്ന ആരോപണത്തെത്തുടര്ന്നാണ് യുപി പോലീസ് വരുണിനെതിരെ ദേശീയ സുരക്ഷാ നിയമം പ്രയോഗിച്ചത്. എന്നാല് വരുണിനെതിരെ എന്എസ്എ ചുമത്താന് മതിയായ കാരണങ്ങള് ഇല്ലെന്നും സര്ക്കാര് നടപടി കടുത്തതായി പോയെന്നും ചൂണ്ടിക്കാണിച്ചു കൊണ്ട് പ്രത്യേക ഉപദേശക സമിതി നടപടി അസാധുവാക്കുകയായിരുന്നു.