ജയപ്രദയെ ആത്മഹത്യ ചെയ്യാന്‍ പ്രേരിപ്പിച്ചു

ലഖ്‌നൊ: മുന്‍ സിനിമാ താരവും രാംപൂര്‍ മണ്ഡലത്തിലെ സ്ഥാനാര്‍ത്ഥിയുമായ ജയപ്രദയെ ആത്മഹത്യ ചെയ്യാന്‍ പ്രേരിപ്പിച്ചുവെന്നാരോപിച്ച്‌ സമാജ്‌ വാദി പാര്‍ട്ടി ജനറല്‍ സെക്രട്ടറി അമര്‍ സിങിനെതിരെ പരാതി.

ജയപ്രദയെ സ്ഥാനാര്‍ത്ഥിയാക്കിയ പ്രശ്‌നത്തില്‍ അമര്‍ സിങുമായി ഇടഞ്ഞു നില്‌ക്കുന്ന അസം ഖാന്റെ അനുയായികളാണ്‌ പോലീസില്‍ പരാതി നല്‌കിയത്‌.

ഞായറാഴ്‌ച രാംപൂരില്‍ നടന്ന റാലിയില്‍ അമര്‍ സിങ്‌ നടത്തിയ പ്രസംഗമാണ്‌ വിവാദമായത്‌. തിരഞ്ഞെടുപ്പില്‍ എങ്ങനെയും ജയിക്കണമെന്നും തോറ്റാല്‍ ജയപ്രദ ആത്മഹത്യ ചെയ്യണമെന്നുമാണ്‌ അമര്‍ സിങ്‌ പറഞ്ഞത്‌. അമര്‍ സിങിനെതിരെ പരാതി ലഭിച്ചിട്ടുണ്ടെന്നും പ്രാഥമികാന്വേഷണത്തിന്‌ ശേഷം കേസ്‌ രജിസ്റ്റര്‍ ചെയ്യുമെന്നും ജില്ലാ പോലീസ്‌ മേധ്വി ജ്യോതി നാരായണ്‍ പറഞ്ഞു.

അമര്‍ സിങ്‌ മുന്‍കൈയ്യെടുത്താണ്‌ ജയപ്രദയെ രാംപൂരില്‍ സ്ഥാനാര്‍ത്ഥിയാക്കിയത്‌. ഇതിനെതിരെ അസം ഖാന്‍ പരസ്യമായി രംഗത്തെത്തിയത്‌ സമാജ്‌ വാദി പാര്‍ട്ടിയിലെ ചേരിപ്പോര്‌ വെളിച്ചത്തു കൊണ്ടു വന്നിരുന്നു. അസമിന്റെ അനുയായികള്‍ ജയപ്രദയ്‌ക്കെതിരെ പ്രചാരണം നടത്തിയിരുന്നു. വന്‍തോതില്‍ പണമൊഴുക്കിയാണ്‌ അമര്‍ സിങ്‌ ഇതിനെ നേരിട്ടതെന്നും ആരോപണമുണ്ട്‌.

ഇതിനിടെ അസം ഖാനും അനുയായികളും തന്റെ അശ്ലീല ചിത്രങ്ങള്‍ സിഡികളിലാക്കി പ്രചരിപ്പിയ്‌ക്കുന്നുണ്ടെന്ന്‌ ജയപ്രദ പരാതിപ്പെട്ടിരുന്നു.