കാമുകന്‍ പീഡിപ്പിച്ച്‌ കൊല്ലാന്‍ ശ്രമിച്ചെന്ന്‌

പാലക്കാട്‌: യുവതിയെ പീഡിപ്പിച്ചശേഷം വിഷം കൊടുത്ത്‌ കൊലപ്പെടുത്താന്‍ ശ്രമം നടന്നതായി പരാതി. ചിറ്റൂര്‍ ഗവണ്‍മെന്റ്‌ എല്‍പി സ്‌കൂളിലെ താല്‍ക്കാലിക അധ്യാപികയായ 22കാരിയാണ്‌ കാമുകനും കന്നങ്കാട്ടുപതി സ്വദേശിയുമായ മിഥിലേഷിനെതിരെ പരാതി നല്‍കിയിരിക്കുന്നത്‌.

ചിറ്റൂര്‍ പോലിസ്‌ 29കാരനായ മിഥിലേഷിനെതിരെ കേസെടുത്തു. തിങ്കളാഴ്‌ചയാണ്‌ യുവതി പൊലീസ്‌ സ്റ്റേഷനില്‍ നേരിട്ടെത്തി പരാതി നല്‍കിയത്‌. ഇവര്‍ രണ്ടുപേരും മൂന്നുവര്‍ഷമായി പ്രണയത്തിലാണത്രേ.

തിങ്കളാഴ്‌ച ഉച്ചതിരിഞ്ഞ്‌ ചിറ്റൂര്‍ അണിക്കോട്‌ ജങ്‌ഷനിലെത്തിയ യുവതിയെ മിഥിലേഷ്‌ വാഹനത്തില്‍ കയറ്റി വണ്ടിത്താവളത്തെ ഒഴിഞ്ഞപ്രദേശത്ത്‌ എത്തിയ്‌ക്കുകയായിരുന്നുവത്രേ. തുടര്‍ന്ന്‌ പ്രലോഭിപ്പിച്ച്‌ ലൈംഗികമായി പീഡിപ്പിക്കയും പിന്നീട്‌ വിഷദ്രാവകം യുവതിയുടെ വായില്‍ ഒഴിച്ചുകൊടുത്ത്‌ കൊലപ്പെടുത്താന്‍ ശ്രമിക്കുകയായിരുന്നുവെന്നും പരാതിയില്‍ പറയുന്നു.

യുവാവിന്‌ മറ്റൊരു വിവാഹം തീരുമാനിച്ചതായും പരാതിയില്‍ സൂചിപ്പിച്ചിട്ടുണ്ട്‌. പരാതിയുമായെത്തിയ യുവതിയെ പൊലീസ്‌ ജില്ലാ ആശുപത്രിയില്‍ വൈദ്യപരിശോധനയ്‌ക്ക്‌ വിധേയയാക്കി. തുടര്‍ന്ന്‌ യുവാവിനെതിരെ പീഡനം, തട്ടിക്കൊണ്ടുപോകല്‍, കൊലപാതകശ്രമം എന്നീ കുറ്റം ചുമത്തി കേസെടുത്തു.