വരുണിനെതിരെയുള്ള എന്‍എസ്എ റദ്ദാക്കാന്‍ ഉത്തരവ്

ദില്ലി: ബിജെപിയുടെ പിലിബിത്ത് സ്ഥാനാര്‍ത്ഥി വരുണ്‍ഗാന്ധിക്കെതിരെ ദേശീയ സുരക്ഷാനിയമം ചുമത്തിയത്‌ റദ്ദാക്കണമെന്ന്‌ സുപ്രീംകോടതി ഉത്തര്‍പ്രദേശ്‌ സര്‍ക്കാരിനോട്‌ നിര്‍ദ്ദേശിച്ചു. ചീഫ് ജസ്റ്റിസ് കെജി ബാലകൃഷ്ണന്‍ ഉള്‍പ്പെട്ട ബഞ്ചാണ് കേസ് പിന്‍വലിയ്ക്കാന്‍ ഉത്തരവിട്ടത്.

തനിയ്ക്കെതിരെ എന്‍എസ്‌എ ചുമത്തിയത്‌ റദ്ദാക്കാന്‍ സംസ്ഥാനതല ഉപദേശകസമിതി ശുപാര്‍ശ ചെയ്‌തത്‌ ചൂണ്ടിക്കാട്ടി വരുണ്‍ ഗാന്ധിയാണ് ഹര്‍ജി സമര്‍പ്പിച്ചത്.

തിരഞ്ഞെടുപ്പ് പ്രചാരണത്തിനിടെ മുസ്ലീം വിരുദ്ധ പ്രസംഗം നടത്തിയതിനാണ് വരുണിനെതിരെ മാര്‍ച്ച്‌ 29ന്‌ മായാവതി സര്‍ക്കാര്‍ എന്‍എസ്‌എ നിയമപ്രകാരം കേസെടുത്തത്. തുടര്‍ന്ന് ജയിലലടയ്ക്കപ്പെട്ട വരുണിന് ഏപ്രില്‍ 16ന് സുപ്രീം കോടതി പരോള്‍ അനുവദിച്ചതോടെയാണ് പുറത്തിറങ്ങാനായത്.

നേരത്തെ അലഹബാദ് ഹൈക്കോടതി നിയോഗിച്ച മൂന്നംഗ ഉപദേശക സമിതി ഉത്തര്‍പ്രദേശ് സര്‍ക്കാരിന്റെ തീരുമാനം അസാധുവാക്കിയിരുന്നു. കേസിന് വേണ്ടത്ര തെളിവുകളില്ലെന്നും അത് നിലനില്ക്കില്ലെന്നുമായിരുന്നു ഉപദേശക സമിതി അറിയിച്ചിരുന്നത്. ഇതിന്റെ അടിസ്ഥാനത്തിലാണ് കേസ് പിന്‍വലിയ്ക്കാന്‍ സുപ്രീം കോടതി ഉത്തരവിട്ടത്.