പൊന്നാനിയില്‍ ബഷീറിന് തകര്‍പ്പന്‍ വിജയം

പൊന്നാനി: പിഡിപി പിന്തുണയോടെ പൊന്നാനിയില്‍ മത്സരിയ്ക്കാനിറങ്ങിയ എല്‍ഡിഎഫ് സ്വതന്ത്രന്‍ ഹുസൈന്‍ രണ്ടത്താണിയ്ക്ക് വന്‍ പരാജയം. മുസ്ലീം ലീഗ് സ്ഥാനാര്‍ത്ഥി ഇടി മുഹമ്മദ് ബഷീര്‍ 82684 വോട്ടുകള്‍ക്കാണ് ഇവിടെ വിജയിച്ചത്.

സിപിഎം ഏറെ വിശ്വാസമര്‍പ്പിച്ച പിഡിപിയുടെ പിന്തുണ പൊന്നാനിയില്‍ വിലപ്പോയില്ലെന്നാണ് തിരഞ്ഞെടുപ്പ് ഫലങ്ങളില്‍ നിന്ന് വ്യക്തമാകുന്നത്.

രണ്ടത്താണിയെ സ്ഥാനാര്‍ത്ഥിയാക്കുന്നതിനെതിരെ സിപിഐ രംഗത്തിറങ്ങിയത് പൊന്നാനി മണ്ഡലത്തെ ദേശീയ രാഷ്ട്രീയത്തില്‍ തന്നെ ഏറെ ശ്രദ്ധേയമാക്കിയിരുന്നു.

പൊന്നാനിയില്‍ രണ്ടത്താണി വന്‍ പരാജയം നേരിട്ട സാഹചര്യത്തില്‍ സിപിഐ വോട്ടുകള്‍ മറിച്ചുവെന്ന മദനിയുടെ ആരോപണം എല്‍ഡിഎഫില്‍ അസ്വാരസ്യങ്ങള്‍ സൃഷ്ടിയ്ക്കുമെന്ന കാര്യമുറപ്പാണ്. അതേ സമയം മദനി ബന്ധം എല്‍ഡിഎഫിന് മൊത്തം ദോഷം ചെയ്തുവെന്ന ആരോപണമായിരിക്കും സിപിഐയും മറ്റു ഘടകകക്ഷികളും ഉയര്‍ത്തുക.

മദനിയെ കൂട്ടുപിടിച്ചിട്ടും പൊന്നായില്‍ ലീഗിന്റെ ഭൂരിപക്ഷം കാര്യമായി കുറയ്ക്കാന്‍ കഴിയാത്തത് കൂട്ടുകെട്ടിന് വേണ്ടി അക്ഷീണം പ്രയത്നിച്ച പിണറായിക്കും കൂട്ടര്‍ക്കും കനത്ത തിരിച്ചടി തന്നെയാണ്. വരും നാളുകളില്‍ പൊന്നാനി പരാജയം സിപിഎം രാഷ്ട്രീയത്തെ ഇളക്കി മറിയ്ക്കുമെന്ന് ഉറപ്പായി കഴിഞ്ഞു.