പാലക്കാട് രാജേഷ് തന്നെ

പാലക്കാട് : സിപിഎം വിമത സ്ഥാനാര്‍ത്ഥി എംആര്‍ മുരളിയുടെ സ്ഥാനാര്‍ത്ഥിത്വത്തിലൂടെ വാര്‍ത്തകളില്‍ നിറഞ്ഞുനിന്ന പാലക്കാട് മണ്ഡലം സിപിഎം നിലനിര്‍ത്തി.

യുവതയുടെ പോരാട്ടമെന്ന് വിശേഷിപ്പിയ്ക്കപ്പെട്ട പാലക്കാട് മണ്ഡലത്തില്‍ യുഡിഎഫിന്റെ ശക്തനായ സ്ഥാനാര്‍ത്ഥി സതീശന്‍ പാച്ചേനിയെ 1820 വോട്ടുകള്‍ക്ക് പിന്നിലാക്കിയാണ് രാജേഷ് വിജയം എത്തിപ്പിടിച്ചത്.

സിപിഎം വിമതന്‍ എംആര്‍ മുരളി, ബിജെപിയുടെ ഗ്ലാമര്‍ സ്ഥാനാര്‍ത്ഥി സികെ പദ്മനാഭന്‍ എന്നിവരെയും പിന്നിലാക്കിയാണ് രാജേഷ് മണ്ഡലം കാത്തത്.

വോട്ടെണ്ണലിന്റെ തുടക്കം മുതല്‍ ഏതാണ്ട് മുക്കാല്‍ ഭാഗം കഴിയുന്നത് വരെയും സതീശന്‍ പാച്ചേനി മുന്നിട്ട് നിന്നതോടെ കോണ്‍ഗ്രസ് ക്യാന്പുകള്‍ വിജയം മണത്തിരുന്നു. എന്നാല്‍ അവസാന റൗണ്ടില്‍ ശക്തമായി തിരിച്ചെത്തി രാജേഷ് വിജയം കൈപ്പിടിയിലൊതുക്കുകയായിരുന്നു.

മുഖ്യമന്ത്രി വിഎസ് അച്യുതാനന്ദന്റെ നിയമസഭാ മണ്ഡലമായ മലന്പുഴ ഉള്‍പ്പെടുന്ന പാലക്കാട് മണ്ഡലത്തിലെ കഷ്ടിച്ചു രക്ഷപ്പെടല്‍ സിപിഎം രാഷ്ട്രീയത്തില്‍ എങ്ങനെ പ്രതിഫലിയ്ക്കുമെന്ന് കണ്ട് തന്നെ അറിയേണ്ടിയിരിക്കുന്നു.