തമിഴി പുലികളുടെ നേതാവ് പ്രഭാകരന്‍ മരിച്ചു?

ദില്ലി: തമിഴ് വിമോചന പുലികളുടെ മേധാവി വി പ്രഭാകരന്‍ മരിച്ചെന്ന് ശ്രീലങ്കാ സൈന്യം വ്യക്തമാക്കി. പ്രഭാകരന്റെ മൃതദേഹം കണ്ടെടുത്തിട്ടുണ്ടെന്നാണ് ശ്രീലങ്ക സൈനിക വൃത്തങ്ങള്‍ വ്യക്തമാക്കിയത്. ശ്രീലങ്ക ഇന്‍ഫര്‍മേഷന്‍ കാര്യ മന്ത്രി സിഎന്‍എന്‍ ഐബിഎന്‍ ചാനലിനോടാണ് ഇത് വ്യക്തമാക്കിയത്.

പ്രഭാകരന്റെ മൃതദേഹം സൈന്യത്തിന്റെ ഒരു കേന്ദ്രത്തിലേയ്ക്ക് കൊണ്ടുപോകുമെന്നും മന്ത്രി വ്യക്തമാക്കി.

പ്രഭാകരന്റെ മരണത്തെക്കുറിച്ച് ശ്രീലങ്ക സൈന്യത്തിന് നേരത്തേ അറിയാമായിരുന്നെന്നാണ് കരുതുന്നത്. എന്നാല്‍ ഇന്ത്യയിലെ തിരഞ്ഞെടുപ്പ് ഫലം പുറത്തുവരുന്നതുവരെ ഇത് പുറത്ത് വിടാതെ സൂക്ഷിയ്ക്കുകയായിരുന്നുവെന്ന് പറയപ്പെടുന്നു.

എല്‍ടിടിഇ യുടെ ഒരു കേന്ദ്രത്തില്‍ നിന്ന് 150 മൃതശരീരങ്ങള്‍ കണ്ടെടുത്തതായും സൈന്യം വ്യക്തമാക്കിയിട്ടുണ്ട്. മൃതദേഹങ്ങള്‍ തിരിച്ചറിയാനുള്ള ശ്രമം നടക്കുകയാണ്.

തമിഴ് പുലികള്‍ ബന്ദികളാക്കിയിരുന്ന തമിഴരെ മോചിപ്പിച്ചതായും സൈന്യം അവകാശപ്പെട്ടു. ഇതോടെ തമിഴി അധീനത്തിലുണ്ടായിരുന്ന പ്രദേശത്ത് സൈന്യം നടത്തിയിരുന്ന ആക്രമണം അവസാനിയ്ക്കുകയാണ്.

പുലികളുടെ ഉന്നത നേതൃത്ത്വത്തിലുള്ളവരെല്ലാം ആത്മഹത്യ ചെയ്തിരിയ്ക്കാമെന്നാണ് സൈന്യം പറയുന്നത്.