ബുദ്ധ രാജിക്കൊരുങ്ങിയെന്ന്‌ റിപ്പോര്‍ട്ട്‌

കൊല്‍ക്കത്ത: പശ്ചിമ ബംഗാള്‍ മുഖ്യമന്ത്രി ബുദ്ധദേവ്‌ ഭട്ടാചാര്യ രാജിവെയ്‌ക്കാന്‍ തയാറായതായി റിപ്പോര്‍ട്ട്‌. തിരഞ്ഞെടുപ്പില്‍ നേരിട്ട വന്‍തിരിച്ചടിയെ തുടര്‍ന്നാണ്‌ ബുദ്ധദേവ്‌ രാജിയ്‌ക്ക്‌ തയാറായതെന്ന്‌ ടെലിഗ്രാഫ്‌ ദിനപത്രം റിപ്പോര്‍ട്ട്‌ ചെയ്യുന്നു.

ഇക്കാര്യം ബുദ്ധദേവ്‌ പാര്‍ട്ടി ദേശീയ നേതൃത്വത്തെ അറിയിച്ചെങ്കിലും തത്സ്‌ഥാനത്ത്‌ തുടരാന്‍ കാരാട്ട്‌ ആവശ്യപ്പെട്ടതായാണ്‌ സൂചന. എന്നാല്‍ ഇത്‌ സംബന്ധിച്ച്‌ ഔദ്യോഗിക വിശദീകരണങ്ങളൊന്നും ഉണ്ടായിട്ടില്ല.

ബുദ്ധദേവിന്റെ രാജി സ്വീകരിയ്‌ക്കാന്‍ കാരാട്ട്‌ തയാറാവില്ലെന്നാണ്‌ സൂചന. ഇങ്ങനെയൊരു സാഹചര്യമുണ്ടായാല്‍ കാരാട്ടും രാജിയ്‌ക്കായും പാര്‍ട്ടിയ്‌ക്കുള്ളില്‍ മുറവിളി ഉയരും.

തിരഞ്ഞെടുപ്പ്‌ ഫലങ്ങള്‍ വിലയിരുത്താനായി തിങ്കളാഴ്‌ച ചേരുന്ന പോളിറ്റ്‌ ബ്യൂറോ യോഗത്തില്‍ ബുദ്ധദേവ്‌ പങ്കെടുക്കുന്നില്ല. തിരഞ്ഞെടുപ്പിന്‌ ശേഷം സംസ്ഥാനത്തുണ്ടായ സംഘര്‍ഷങ്ങളെ തുടര്‍ന്നാണ്‌ പിബി യോഗത്തില്‍ പങ്കെടുക്കാത്തതെന്നാണ്‌ ഔദ്യോഗിക വിശദീകരണം.

എന്നാല്‍ പരാജയത്തെ തുടര്‍ന്ന്‌ സിപിഎമ്മില്‍ രൂപപ്പെട്ട ഭിന്നതയാണ്‌ ബുദ്ധദേവിന്റെ വിട്ടുനില്‌ക്കലിന്‌ കാരണമായതെന്ന്‌ രാഷ്ട്രീയ നിരീക്ഷകര്‍ പറയുന്നു.