മുസ്ലീം ലീഗ് മന്ത്രിസ്ഥാനം ചോദിച്ച് വാങ്ങില്ല

കോഴിക്കോട് : മുസ്ലീം ലീഗ് കേന്ദ്രത്തില്‍ മന്ത്രിസ്ഥാനം ആവശ്യപ്പെടില്ലെന്ന്‌ ലീഗ് സംസ്ഥാന ജനറല്‍ സെക്രട്ടറി പി കെ കുഞ്ഞാലിക്കുട്ടി. ലീഗ് പ്രവര്‍ത്തക സമിതി യോഗത്തിന് ശേഷം നടത്തിയ വാര്‍ത്താ സമ്മേളനത്തില്‍ സംസാരിയ്ക്കുകയായിരുന്നു അദ്ദേഹം.

ലീഗ് ഒന്നും ചോദിച്ച് വാങ്ങാറില്ല. അര്‍ഹിയ്ക്കുന്നത് കിട്ടുമെന്ന പ്രതിക്ഷ ഞങ്ങള്‍ക്കുണ്ട്. കോണ്‍ഗ്രസിന്റെ നല്ല കാലത്തും മോശം കാലത്തും ലീഗ് ഒപ്പം നിന്നിട്ടുണ്ട്. അര്‍ഹിക്കുന്ന പരിഗണന എല്ലാ കാലത്തും കോണ്‍ഗ്രസ് നേതൃത്വത്തില്‍ നിന്ന് ലീഗിന് ലഭിച്ചിട്ടുണ്ട്. അത് തുടര്‍ന്നും ലഭിക്കുമെന്നും കുഞ്ഞാലിക്കുട്ടി പറഞ്ഞു.

തെരഞ്ഞെടുപ്പു ഫലം വിലയിരുത്താന്‍ തിങ്കളാഴ്ച കോഴിക്കോട് മുസ്ലീംലീഗിന്റെ സംസ്ഥാനതല യോഗം ചേരുന്നുണ്ട്. മലപ്പുറത്തും പൊന്നാനിയിലും വന്‍ വിജയം നേടിയ പശ്ചാത്തലത്തിലാണ് യോഗം.

ലീഗിന്റെ ആസ്ഥാനം പിടിയ്ക്കാന്‍ വന്നവര്‍ക്ക് സ്വന്തം അരമന നഷ്ടപ്പെട്ടുവെന്ന് തിരഞ്ഞെടുപ്പുമായി ബന്ധപ്പെട്ട ചോദ്യത്തിന് മറുപടിയായി അദ്ദേഹം പറഞ്ഞു. എന്‍ഡിഎഫ് ബന്ധത്തെക്കുറിച്ചുള്ള ചോദ്യങ്ങള്‍ക്ക് അത്തരം ചര്‍ച്ചകള്‍ ഈ ശുഭമുഹൂര്‍ത്തത്തില്‍ വേണ്ടെന്നായിരുന്നു കുഞ്ഞാലിക്കുട്ടിയുടെ മറുപടി.