പ്രഭാകരന്‍ മരിച്ചിട്ടില്ലെന്ന്‌ പുലികള്‍ വീണ്ടും

കൊളംബോ: പുലിത്തലവന്‍ വേലുപ്പിള്ള പ്രഭാകരന്‍ ജീവിച്ചിരിക്കുന്നുണ്ടെന്ന്‌ തമിഴ്‌പുലി അനുകൂല വെസ്‌ സൈറ്റായ തമിഴ്‌നെറ്റ്‌ ആവര്‍ത്തിച്ചു.

എല്‍ടിടിഇ ഇന്റലിജന്‍സ്‌ വിഭാഗം തലവന്‍ അറിവഴകന്‍, വിദേശവിഭാഗം മേധാവി സെല്‍വരാജ പത്മനാഥന്‍ എന്നിവരെ ഉദ്ധരിച്ചാണ്‌ തമിഴ്‌നെറ്റ്‌ ഇക്കാര്യം റിപ്പോര്‍ട്ട്‌ ചെയ്‌തിരിക്കുന്നത്‌.

പ്രഭാകരന്റെ മൃതദേഹം പുലികള്‍ തിരിച്ചറിഞ്ഞതായി ലങ്കയിലെ പ്രതിരോധമന്ത്രാലയം പ്രസ്‌താവന ഇറക്കി മണിക്കൂറുകള്‍ക്കുള്ളിലാണ്‌ പുലി നേതാക്കളുടെ പ്രസ്‌താവന വെബ്‌സൈറ്റില്‍ വന്നത്‌.

ലങ്കന്‍ സേനയുടെ ആക്രമണത്തില്‍ പ്രഭാകരന്‍ കൊല്ലപ്പെട്ടതായുള്ള വാര്‍ത്തകള്‍ ലോകതമിഴ്‌ ജനതയില്‍ ആശയക്കുഴപ്പമുണ്ടാക്കാനുദ്ദേശിച്ചുള്ളതാണ്‌. പ്രഭാകരന്റേതായി ലങ്കന്‍ ടെലിവിഷനില്‍ കാണിച്ച മൃതദേഹം കിംവദന്തിയെ ബലപ്പെടുത്താന്‍ കെട്ടിച്ചമച്ചതാണെന്നും വെബ്‌ സൈറ്റില്‍ പറയുന്നു.

ഞങ്ങളുടെ നേതാവ്‌ ജീവിച്ചിരിക്കുന്നു. സ്വതന്ത്ര തമിഴ്‌ രാഷ്ട്രത്തിനായുള്ള പോരാട്ടത്തെ പിന്തുണയ്‌ക്കുന്ന ആഗോള തമിഴ്‌ജനതയെ ആശയക്കുഴപ്പത്തിലാക്കാനുള്ള ശ്രമമാണ്‌ ഇപ്പോള്‍ നടക്കുന്നത്‌- അറിവഴകന്‍ പറഞ്ഞു.

പുലി നേതൃത്വം ഉചിതമായ സമയത്ത്‌ ജനങ്ങളുമായി ബന്ധപ്പെടും. ലങ്കയിലെ മുതിര്‍ന്ന പത്രപ്രവര്‍ത്തകര്‍ വഴി സങ്കേതം വെളിപ്പെടുത്താതെ നല്‍കിയ പ്രസ്‌താവനയിലാണ്‌ അറിവഴകന്‍ ഇങ്ങനെ പറഞ്ഞത്‌.

പ്രഭാകരന്‍ കൊല്ലപ്പെട്ടുവെന്നും ഡിഎന്‍എ പരിശോധനയില്‍ മരിച്ചത്‌ പ്രഭാകരന്‍ തന്നെയാണെന്ന്‌ സ്ഥിരീകരിച്ചുവെന്നും ലങ്കയിലെ സര്‍ക്കാര്‍ പ്രഖ്യാപിച്ചെങ്കിലും തമിഴ്‌ ജനത അത്‌ പൂര്‍ണമായും വിശ്വസിച്ചിട്ടില്ല.

ഇതിനിടെ പ്രഭാകരന്റെ ഇന്ത്യയിലെ കേസുകള്‍ അവസാനിപ്പിക്കണമെങ്കില്‍ മരണസര്‍ട്ടിഫിക്കറ്റ്‌ നല്‍കണമെന്ന്‌ കേന്ദ്രസര്‍ക്കാര്‍ ലങ്കയിലെ ആഭ്യന്തരമന്ത്രാലയത്തോട്‌ ആവശ്യപ്പെട്ടിട്ടുണ്ട്‌.