സിപിഎമ്മിന്റെ തിരഞ്ഞെടുപ്പ്‌ അവലോകനം തുടങ്ങുന്നു

തിരുവനന്തപുരം: തിരഞ്ഞെടുപ്പില്‍ പാര്‍ട്ടിയ്‌‌ക്കുണ്ടായ കനത്ത പരാജയത്തെക്കുറിച്ച്‌ വിലയിരുത്താന്‍ ഞായറാഴ്‌ച മുതല്‍ സിപിഎം സംസ്ഥാന സെക്രട്ടേറിയറ്റ്‌ ചേരുന്നു. രണ്ടു ദിവസം നീളുന്ന യോഗത്തിന്‌ ശേഷം സംസ്ഥാന കമ്മിറ്റി മൂന്ന്‌ ദിവസത്തെ യോഗവും ചേരുന്നുണ്ട്‌.

പാര്‍ട്ടി ജനറല്‍ സെക്രട്ടറി പ്രകാശ്‌ കാരാട്ടും പൊളിറ്റ്‌ ബ്യൂറോ അംഗം എസ്‌ രാമചന്ദ്രന്‍പിള്ളയും യോഗത്തില്‍ പങ്കെടുക്കും. വിഎസ്‌ പക്ഷം വോട്ട്‌ മറിച്ചുവെന്നതുള്‍പ്പെടെയുള്ള ആരോപണങ്ങള്‍ ഔദ്യോഗിക പക്ഷം ചര്‍ച്ചയ്‌ക്കുകൊണ്ടുവരും.

ഓരോ വിഷയത്തിലും വിഎസ്‌ സ്വീകരിച്ച നിലപാടായിരിക്കും യോഗത്തില്‍ പിണറായി പക്ഷം ആയുധമാക്കുക. വാര്‍ത്താസമ്മേളനത്തിലെ വിഎസിന്റെ പരാമര്‍ശങ്ങളും തിരഞ്ഞെടുപ്പിനെ ബാധിച്ചിട്ടുണ്ടെന്ന്‌ ചൂണ്ടിക്കാണിച്ചായിരിക്കും ഔദ്യോഗിക പക്ഷം വാദിക്കുക.

എന്നാല്‍ പാര്‍ട്ടി തോല്‍വി ഇരന്നുവാങ്ങുകയായിരുന്നുവെന്ന ഘടകക്ഷികളുടെ നിലപാടായിരിക്കും വിഎസ്‌ സ്വീകരിക്കുകയെന്നാണ്‌ സൂചന. എന്തായാലും ഇക്കാര്യത്തില്‍ കേന്ദ്ര നേതൃത്വത്തിന്റെ നിലപാട്‌ നിര്‍ണായകമായിരിക്കും.

ലോക്‌സഭാ തിരഞ്ഞെടുപ്പ്‌ അവലോകനമാണ്‌ യോഗത്തിന്റെ മുഖ്യ അജണ്ടയെങ്കിലും പാര്‍ട്ടിയില്‍ ദീര്‍ഘകാലമായി പുകയുന്ന ഭിന്നത യോഗത്തില്‍ വലിയ പ്രശ്‌നങ്ങളുയര്‍ത്തുമെന്നാണ്‌ സൂചനകള്‍. ലാവലിന്‍ കേസ്‌, പിഡിപി ബന്ധം തുടങ്ങിയവയായിരിക്കും വിഎസ്‌ പക്ഷം ആയുധമാക്കുക.

തിരഞ്ഞെടുപ്പ്‌ ഫലം അവലോകനം ചെയ്‌ത്‌ വിവിധ ജില്ലാ കമ്മിറ്റികള്‍ നല്‍കിയ റിപ്പോര്‍ട്ടുകള്‍ ക്രോഡീകരിച്ച്‌ സംസ്ഥാന സെക്രട്ടറി തയ്യാറാക്കുന്ന റിപ്പോര്‍ട്ടിനെ അധികരിച്ചായിരിക്കും സെക്രട്ടേറിയറ്റ്‌ യോഗങ്ങളില്‍ ചര്‍ച്ച നടക്കുക.